माओवादी केन्द्रको केन्द्रीय कमिटीको तेस्रो बैठकले पदाधिकारी टुंगो लगाउन सकेन। बैठकमा अध्यक्ष प्रचण्डले पदाधिकारी चयन गर्नको लागि तयारी नपुगेकाले २–४ दिनको समय दिन केन्द्रीय सदस्यहरूसँग अनुरोध गरेका छन्। 

‘पदाधिकारी चयन गर्न गृहकार्य पुगेन। २–४ दिनको समय दिनुहोस्। सबैको अनुहार उज्यालो हुने गरी पदाधिकारी टुंगो लाग्छ’, प्रचण्डले बैठकमा भने। 

बैठकले केन्द्रीय समिति, स्थायी समिति र पोलिटब्यूरो टुंगो लगाएको भन्दै प्रचण्डले केही दिनको समय दिए पदाधिकारी चयन गर्दा पनि सबैको अनुहार उज्यालो हुने बताए। 

महासचिव र उपमहासचिवको प्रस्ताव तयार भइसकेको भए पनि त्यसमा थप गृहकार्य गर्न आवश्यक रहेको उनले बताए। 

‘म अहिले पनि यी नाम पढ्न सक्छु तर, प्लिज मलाई अहिले पढ्न नलगाउनुहोस्’, प्रचण्डले केन्द्रीय सदस्यहरूसँग अनुरोध गरेका छन्।