नेकपा (एकीकृत समाजवादी)का अध्यक्ष माधवकुमार नेपालले ५ दलीय गठबन्धन आगामी निर्वाचनसम्म जाने बताएका छन् । 

समाजवादी प्रेस संगठन नेपाल रुपन्देहीले बुटवलमा शनिवार आयोजना गरेको पत्रकार सम्मेलनमा बोल्दै उनले सो कुरा बताएका हुन् । 

अध्यक्ष नेपालले गठबन्धन राष्ट्रिय आवश्यकता बनेको र निरन्तर नै रहने भन्दै स्थानीय तह निर्वाचनमा समाजवादी पार्टीले सफलता प्राप्त गरेको दाबी गरे । 

एक महानगर, उपमहानगर मेयरसहित विभिन्न स्थानमा उपप्रमुख जितेको र धेरै तहमा अत्यधिक मत प्राप्त गरेको उनले बताए । 

उनले भने, 'हामीले स्थानीय तहमा हाम्रो पार्टीले सफलता हासिल गरेको छ । महानगर, उपमहानगरसहित धेरै ठाउँमा विजयी भएको छ ।  हामी आगामी निर्वाचनका लागि तयारीमा जुटेका छौं, अझै सफलता पाउने छौँ  ।'

अध्यक्ष नेपालले गठबन्धन आवश्यकताअनुसार भए तापनि आफूहरू आफ्नै बलमा निर्वाचन लडेको बताए । उनले निर्वाचनमा आफूहरूमाथि षड्यन्त्र भएको समेत उल्लेख गरे । 

'हामी निर्वाचनमा आफ्नै बलले होमिएका हौं, गठबन्धन माध्यम थियो, निर्वाचनको शुरुदेखि नै षड्यन्त्र भयो,' उनले भने, 'मतपत्रकै कारण धेरै मत बदर भए, हामीले पाएको मत र बदर भएको हेर्दा हामीलाई अत्यधिक मत प्राप्त भएको थियो ।'