संस्कृति, पर्यटन तथा नागरिक उड्डयनमन्त्री जीवनराम श्रेष्ठले भारतसँग नयाँ हवाई प्रवेश विन्दु उपलब्ध गराउन प्रस्ताव गरेका छन् । शुक्रवार मन्त्रालयमा भएको भेटमा क्रममा उनले भारतीय राजदूत नवीन श्रीवास्तसँग नयाँ हवाई प्रवेश विन्दु उपलब्ध गराउन प्रस्ताव गरेका हुन् । 

मन्त्रालयमा भएको भेटमा उनीहरूबीच दुई देशबीचको सम्बन्ध र सहकार्यका विविध पक्षमा कुराकानी भएको थियो । मन्त्री श्रेष्ठले राजदूत श्रीवास्तवको कार्यकालमा दुई देशबीचको सम्बन्धलाई अझ उचाइमा पुर्‍याउन सफल हुने विश्वास व्यक्त गरे । 

उनले गौतमवुद्ध अन्तर्राष्ट्रिय विमानस्थल पूर्ण क्षमतामा सञ्चालनका लागि नयाँ हवाई प्रवेश विन्दु उपलब्ध गराउन राजदूत श्रीवास्तवसँग प्रस्ताव गरे । नयाँ हवाई प्रवेश विन्दु उपलब्ध भएमा उडान खर्च र समय घट्नुका साथै हवाई ट्राफिक जामको समस्या समाधान हुने मन्त्री श्रेष्ठको भनाइ छ । 

राजदूत श्रीवास्तवले नयाँ हवाई प्रवेश विन्दुको विषयमा छिट्टै निर्णयमा पुग्ने विश्वास दिलाएका छन् । 

भगवान् राम र सीतासँग जोडिएका धार्मिक स्थलहरूलाई जोड्ने रामायण सर्किट सम्बन्धी पूर्वाधार निर्माण अघि बढाउनेबारे पनि उनीहरूबीच छलफल मन्त्री श्रेष्ठको सचिवालयले जानकारी दिएको छ । रामायण सर्किटले धार्मिक पर्यटन प्रवद्र्धनमा सहयोग पुग्ने मन्त्री श्रेष्ठको भनाइ छ । 

जनकपुरको धार्मिक तथा पौराणिक महत्व झल्काउँदै पर्यटकीय गन्तव्यको रूपमा विकास गर्न भारतीय प्रधानमन्त्री नरेन्द्र मोदीको नेपाल भ्रमणको समयमा समझदारी भएको बृहत्तर जनकपुर क्षेत्र विकास सम्वन्धी परियोजना अघि बढाउनेबारे पनि छलफल भएको थियो ।