रणवीर कपूरको बहुप्रतिक्षित फिल्म ‘शमशेरा’ जुलाई २२ बाट फिल्म हलहरुमा रिलिज भएको छ । चलचित्रले दर्शक र समीक्षकबाट मिश्रित प्रतिक्रिया पाइरहेको छ । फिल्मले पहिलो दिन भने बक्स अफिसमा खासै राम्रो कमाई गर्न सकेन । 
रिपोर्टका अनुसार १५० करोड भारुको बजेटमा बनेको ‘शमशेरा’ले पहिलो दिन बक्स अफिसमा जम्मा १०.२५ करोड भारु मात्र कलेक्सन गर्न सक्यो ।
फिल्म विश्वभर ५५०० स्क्रिनमा रिलिज भएको छ भने भारतमा ४३५० स्क्रिन पाएको छ । तर यति धेरै स्क्रिन पाउदाँ पनि फिल्मले राम्रो ओपनिङ गर्न सकेन । 

पहिलो दिनको खराब प्रदर्शनपछि विश्वभर फिल्मका धेरै शो रद्द गरिएको बताइएको छ । फिल्म व्यापार विश्लेषकहरुले रणवीरको लामो समयपछि आएको यो फिल्म उनको अर्को फ्लप फिल्म हुने देखिएको बताएका छन् ।  
रणवीर चार वर्षपछि ‘शमशेरा’ मार्फत फर्किएका छन् । पछिल्लो पटक रनवीर सन् २०१८ मा रिलिज भएको सञ्जय दत्तको जीवनमा आधारित फिल्म ‘सञ्जु’ मा देखिएका थिए ।

शमशेरा रणवीर कपूरको करियरको छैटौं सर्वाधिक ठूलो ओपनिङ गर्ने फिल्म बनेको छ । रणवीरको सबैभन्दा धेरै ओपनिङ डे कमाई गर्ने फिल्म सञ्जु फिल्मले पहिलो दिन ३४.७५ करोड भारु कमाएको थियो । 
त्यसपछि उनका धेरै ओपनिङ डे कमाई गर्ने फिल्महरु क्रमशः बेशर्मले २१.५६ करोड भारु, ए जवानी हे दिवानीले १९.४५ करोड भारु, ए दिल हे मुश्किले १३.३ करोड भारु र तमाशाले १०.९४ करोड भारु कमाएका थियो । 
तर ओपनिङ डेको कमाईको हिसाबले यस फिल्मले यसै वर्ष आएका अक्षय कुमारको ‘पृथ्वीराज’ (१०.७० करोड भारु ) र आलिया भट्टको ‘गंगुबाई काठियावाडी’ (१०.५० करोड भारु) लाई उछिन्न सकेन ।