बाँकेको कोहलपुरस्थित इलाका प्रहरी कार्यालयमा कार्यरत प्रहरी सहायक निरीक्षक (असई) प्रविण चौलागाई हिरासतमा रहेकी महिलामाथि यौन दुर्व्यवहार गरेको आरोपमा शुक्रवार पक्राउ परेका छन् ।

जिल्ला प्रहरी कार्यालय, बाँकेका प्रहरी प्रमुख प्रहरी उपरीक्षक (एसपी) श्यामकृष्ण अधिकारीले दिएको जानकारी अनुसार असई चौलागाईले हिरासतमा रहेकी महिलालाई मध्यराति आफू सुत्ने कोठामा लगेका थिए । उनले हिरासतमा रहेकी महिलालाई कोठामा लिएर गएको पुष्टि भएपछि पक्राउ गरी आवश्यक अनुसन्धान अगाडि बढाइएको एसपी अधिकारीले जानकारी दिए । चौलागाईले बहुविवाहको मुद्दामा थुनामा रहेकी महिलालाई आवश्यक शोधपुछका लागि भन्दै शुक्रबार मध्यराति दुई बजे हिरासतको माथिल्लो तलामा पुर्‍याएका थिए । 

उक्त महिला बहुविवाह मुद्दामा साउन ११ गते पक्राउ परेकी थिइन् । एसपी अधिकारीले भने, ‘हिरासतमा रहेकी महिलालाई निकालेर भवनको माथिल्लो तलामा लगेपछि चौलागाईमाथि यौन दुव्र्यवहार तथा बलात्कार भएको आशंकामा पक्राउ गरी जिल्ला प्रहरी कार्यालयमा ल्याएर आवश्यक अनुसन्धान गरिहेका छौँ ।’ असई चौलागाईले आफू सुत्ने कोठामा लगेर महिलालाई सामान्य सोधपुछ गर्नुका साथै हातपात पनि गरेको बताइएको छ । 

बर्दिया घर भई विगत ८ महिनादेखि चौलागाई इप्रका कोहलपुरको मुद्दा शाखामा कार्यरत छन् । असई चौलागाईंले हिरासतमा भएकी महिलालाई मध्यरातमा निकाल्न आदेशपछि हिरासतमा बसेका अरूले हो–हल्ला गरेका थिए । उनले उक्त महिलालाई १० मिनेटसम्म कोठामा राखेको बताइएको छ ।