बुटवलको मुख्य बजार क्षेत्र (राजमार्ग चौराहा–गोलपार्क) को सडकको काम ठेकेदार कम्पनीले अलपत्र पारेपछि सडक विस्तार आयोजनाले ठेक्का तोड्ने चेतावनी दिएको छ ।

निर्माण सम्झौता भएको ६ वर्षसम्म पनि सडक निर्माणको काम सम्पन्न नभएको भन्दै बेलहिया–बुटवल व्यापारिक आयोजनाले ठेकेदार कम्पनीसँग ठेक्का सम्झौता तोड्ने बताएको हो ।

अन्तिम पटकका लागि भन्दै थपिएको म्याद पनि गत असार ३० गते सकिएको छ ।

शुक्रवार सूचना प्रकाशित गर्दै व्यापारिक मार्ग विस्तार आयोजना बेलहिया–बुटवल सडकले ठेक्का कार्यको न्यून कार्य प्रगति भएको, म्याद समाप्त भएको र बाह्य समस्या विना पनि लामो समयसम्म निर्माणको कार्य रोकिएको भन्दै ठेक्का सम्झौता अन्त्य किन नगर्ने भन्दै सूचना प्रकाशित गरेको छ ।

आयोजना प्रमुख दीपककुमार झाले ठेकेदार कम्पनीलाई निर्माण कार्य अगाडि बढाउन विभिन्न मितिमा लिखित र मौखिक ताकेता गर्दा समेत सन्तोषजनक कार्यप्रगति नभएको बताए । सार्वजनिक खरिद ऐन २०६३ तथा नियमावली २०६४ बमोजिम ठेक्का किन अन्त्य नगर्ने भन्दै उनले सूचना प्रकाशित गरेको जानकारी दिए ।

‘ठेक्का सम्झौता अन्त्य गर्न नपर्ने कुनै मनासिब कारण भए ७ दिनभित्र भरपर्दो स्पष्टीकरणसहित आयोजनाको कार्यालयमा उपस्थित हुन भनेका छौं । स्पष्टीकरण चित्तबुझ्दो नभएमा ठेक्का सम्झौताका शर्त र सीओसी तथा प्रचलित ऐन–नियमअनुसार कानूनी कारबाही अगाडि बढाउने तयारी छ,’ आयोजना प्रमुख झाले भने ।

आयोजनाले ३ वटा ठेक्का तोड्ने गरी प्रक्रिया शुरू गरेको छ । बिरुवा कन्सट्रक्सन प्रालि मध्यबानेश्वर काठमाडौंले लिएको ठेक्का टीआरआईपी/३३७३१२४/बिबि/०७३/०७४–००१, बिरुवा–श्रेष्ठ–एपेक्स जेभी काठमाडौंको ठेक्का नम्बर  टीआरआईपी/३३७३१२४/बीबी ०७१/०७२–००२ र द कञ्चनजंगा–बिरुवा जेभी, मध्यबानेश्वर काठमाडौंले ठेक्का पाएको ठेक्का नम्बर टीआरआईपी/३३७३१२४/बीबी ०७३/०७४–००३ तोड्ने गरी प्रक्रिया अघि बढाएको हो । यी ३ वटा ठेक्का बेलहिया, पड्सरी र बुटवलका हुन् ।

बुटवलको मुख्य बजार क्षेत्रको सडक बेहाल हुँदा वर्षाैंदेखि सर्वसाधारणले समस्या खेप्दै आएका छन् । यो सडक साढे ३ किलोमिटर छ । चौराहा–गोलपार्क सडक खण्डमा नाली निर्माणको काम अहिले पनि चलिरहेको इन्जिनीयर सविता ज्ञवालीले बताइन् ।

स्पष्टीकरण चित्तबुझ्दो नभएमा ठेक्का सम्झौताका शर्त र सीओसी तथा प्रचलित ऐन–नियमअनुसार कानूनी कारबाही अगाडि बढाउने आयोजनाको भनाइ छ । २०७३ चैत १७ गते ठेक्का सम्झौता भई २०७६ असोज १२ गतेसम्म काम सक्नुपर्ने भए पनि जग्गा विवादले समय अदालती उल्झनमै बितेको थियो ।

सडक विस्तारको बाटो खुलेपछि पुनः तोकिएको समय अवधिमा समेत निर्माण कम्पनीले काम गर्न नसक्दा म्याद थपेर २०७९ असार ३० गतेसम्म निर्माण सक्नुपर्ने सम्झौता भएको हो । ५३ करोड ९७ लाख सडक निर्माणको ठेक्का लागेको थियो । ठेकेदार कम्पनीले हालसम्म १३ करोडभन्दा बढी रकम भुक्तानी लगिसकेको छ ।