नेकपा एमालेका उपाध्यक्ष विष्णु पौडेलले गुटबन्दीमा नलाग्न कार्यकर्तालाई निर्देशन दिएका छन् । पार्टीभित्रको अन्तरकलहका कारण गएको स्थानीय तहको निर्वाचनमा सोचेजस्तो परिणाम नआएको भन्दै उनले सबै कार्यकर्तालाई अनुशासित ढंगले परिचालित हुन निर्देशन दिएका हुन् । 

उनले यसअघि सरकारमा हुँदा पार्टीले गरेका राम्रा कामहरू जनस्तरसम्म पुर्‍याउन पनि कार्यकर्ताहरूलाई निर्देशन दिएका छन् । नेकपा एमाले लुम्बिनी प्रदेशस्तरीय संगठन व्यवस्थापन तथा परिचालन विषयक दुई दिने कार्यशालामा पौडेलले सरकारमा रहँदा एमालेले दूरगामी प्रभाव पार्ने काम गरेको प्रसंग उल्लेख गर्दै ती कामलाई व्यवस्थित ढंगले जनतामा लैजान जरूरी रहेको बताए  ।

स्थानीय चुनावमा कांग्रेस वा अरू कुनै नेकपा एमालेसँग नलडेको बरू गठबन्धन लडेको स्मरण गराउँदै चौतर्फी घेराबन्दीका बीचमा सर्वाधिक लोकप्रिय मत प्राप्त गरेको तथ्य पौडेलले प्रस्तुत गरे । आगामी निर्वाचनमा जनतामा लोकप्रिय र जित्न सक्ने सम्भावना भएका व्यक्तिलाई टिकट दिने नीति रहेको बताए । 

उपाध्यक्ष पौडेलले एमाले विचार निर्माण, संगठन निर्माण र परिचालनका हिसाबले संसारका कुनै पनि पार्टीभन्दा व्यवस्थित र सुदृढ रहेको विश्वास व्यक्त गर्दै केही समय यता पार्टी आफ्नै मौलिक अभ्यासबाट स्खलित हुन पुगेकोमा चिन्ता प्रकट गरे । ‘एमालेको सार्वभौमसत्ता एमालेका सदस्यमा निहित रहेकोले सिद्धान्त, नीति र कार्यक्रम कार्यकर्ताले चाहे अनुसार नै हुने छ । तर, सिद्धान्तको बर्को ओढेर गुटबन्दी गर्ने अधिकार कसैसँग छैन’ उनले भने ।