दक्षिण कोरियाका राष्ट्रपति यून सुक–योलले अमेरिकी सभामुख न्यान्सी पलोसीसँग भेटघाट गरेका छैनन् । 

एसिया भ्रमणका क्रममा पलोसी ताइवानबाट दक्षिण कोरिया पुगेकी थिइन् । 

गत मे महिनामा कार्यकाल थालेका यूनले पलोसीसँग फोनमा कुराकानी गर्ने तर आमनेसामने भेटघाट नगर्ने स्थानीय सञ्चारमाध्यमहरूले लेखेका छन् । 

पलोसीले पूर्वी एसियाको भ्रमणको तालिका सार्वजनिक गर्नुअघि नै यूनले ग्रीष्मकालीन बिदा लिने निर्णय लिइसकेका थिए । अहिले यून राजधानी सौलमै रहेको बताइन्छ । 

पलोसी ताइवान पुगेपछि चीन आक्रोशित भएको छ र बिहीवारदेखि ताइवान वरपर ६ स्थानमा लाइभ फायर सैन्य अभ्यास गरिरहेको छ । वाशिङटन र ताईपेईविरुद्ध आक्रोश व्यक्त गर्न चीनले यो अभ्यास थालेको हो । 

चीन यसरी रिसाएको बेलामा पलोसीलाई भेटेर त्यो आक्रोश आफूतिर निम्त्याउन हुन्न भन्ने कुरा यूनलाई थाहा छ । आजोऊ विश्वविद्यालयमा अमेरिका–चीन नीति संस्थाका निर्देशक किम ह्युङ–क्युले कोरिया टाइम्सलाई बताए, ‘सामान्य अवस्था भएको भए राष्ट्रपतिले पलोसीलाई भेट्थे होलान् तर यस विषयलाई राजनीतीकरण गर्न तथा चीनलाई अनावश्यक रूपमा चिढ्याउन ठीक छैन भनी सरकारले निर्णय लिएको हुनुपर्छ ।’