भदौं ३ गतेदेखि प्रदर्शनमा आउने तयारीमा रहेको चलचित्र ‘कृष्ण लीला’को अष्ट्रेलिया प्रदर्शन अधिकार (राइट्स) बिक्री भएको छ । प्रदर्शनको मिति नजिकिँदै जाँदा चर्चामा रहेको चलचित्रको अष्ट्रेलिया निवासी निकेश मानन्धरले राइट्स खरिद गरेका हुन् । बिहीवार राजधानीमा निकेशका प्रतिनिधि र ‘कृष्ण लीला’ टीमबीच अष्ट्रेलिया राइट्स बिक्रीको सम्झौतापत्र आदन–प्रदान भयो । 

चलचित्रको अष्ट्रेलिया राइट्स ८ लाख रुपैयाँमा बिक्री भएको हो । ट्रेलर र गीतबाट चर्चा बटुलेको चलचित्रको विदेशमा राम्रो माग देखिएको छ । 

अब अन्य देशहरूमा पनि चलचित्रको प्रदर्शन अधिकारी बिक्री गर्ने कार्यकारी निर्माता रत्न श्रेष्ठले जानकारी दिए । चलचित्रले प्रदर्शनभन्दा अगावै लगानीको केही हिस्सा उठाएको छ । चलचित्रको डिजिटल राइट्स पनि महँगोमा बिक्री भएको निर्माण टिमको दाबी छ । 

दीपक ओली निर्देशित ‘कृष्ण लीला’मा पुष्प खड्का र श्रद्धा क्षेत्री मुख्य भूमिकामा छन् । साथमा बुद्धि तामाङ, रविन्द्र झा, आयुषा क्षेत्री, नवीन रेग्मी, हिउँवाला गौतम, आयुष गुरागाईँ लगायतको अभिनय छ । आरआर फिल्मस् (रोहित रत्न) को ब्यानरमा रोहित कट्टेलको प्रस्तुति रहेको चलचित्रको कार्यकारी निर्माता रत्न श्रेष्ठ हुन् भने निर्मातामा प्रकाशराज कार्की र केवल तामाङ छन् । 

लक्ष्मण सुवेदीको लेखन रहेको चलचित्रमा शिव ढकालको छायाँकन, अर्जुन जिसीको सम्पादन छ । चलचित्रमा पुष्प सुस्त मनस्थिति भएको युवकको भूमिकामा छन् । आफ्नो भूमिकासँगै चलचित्रको विषयवस्तुलाई दर्शकले रुचाउनेमा पुष्प विश्वस्त देखिन्छन् ।