श्रम समझदारीपत्र अनुसार जापानको स्पेसिफाइड स्किल्ड वोर्कर्स प्रणालीमार्फत नेपाली नागरिकलाई जापानमा रोजगारी दिने विषयमा संयुक्त कार्यसमितिको दोस्रो बैठक सम्पन्न भएको छ । 

बैठकमा नेपालको तर्फबाट श्रम, रोजगार तथा सामाजिक सुरक्षा मन्त्रालयका सहसचिव राजिव पोखरेलको संयोजकत्वमा परराष्ट्र मन्त्रालयका प्रतिनिधि योजना बम्जन, कानून न्याय तथा संसदीय मामिला मन्त्रालयका हिमालचन्द्र अर्याल, वैदेशिक रोजगार विभागका निर्देशक डम्बर बहादुर सुनुवार र मन्त्रालयका उपसचिव डा. थानेश्वर भुसाल रहेका थिए ।

जापानको तर्फबाट सहायक उपमन्त्री चोतुमो नाकागावाको नेतृत्वमा चार सदस्यीय प्रतिनिधिमण्डलले बैठकमा सहभागिता जनाएका थिए । 

बैठकलाई सम्बोधन गर्दै श्रम, रोजगार तथा सामाजिक सुरक्षा मन्त्रालयका सचिव एकनारायण अर्यालले नेपाल–जापान श्रम समझदारी पत्र कार्यान्वयन गर्नुपर्नेमा जोड दिए । 

बैठकमा नेपाल जापान श्रम समझदारीपत्रमा नेपाल तथा जापानका समसामयिक कानूनी व्यवस्थाहरू समेटेर परिमार्जन  गर्नेबारे छलफल भएको थियो । 

यस्तै नेपालमा जापानिज भाषा र सीप परीक्षा उत्तीर्ण गरी जापान जान तयारी अवस्थामा रहेका नेपालीहरूलाई छिटो जापान पठाउने विषयमा सहजीकरण गर्नेबारे पनि छलफल भएको डा. भुसालले जानकारी दिए ।