जनमत पार्टीका अध्यक्ष डा. चन्द्रकान्त (सीके) राउत सप्तरीको संसदीय क्षेत्र नम्बर २ बाट प्रतिनिधिसभाको चुनाव लड्ने भएका छन् । जनमत पार्टीको केन्द्रीय समिति बैठकले उनी उक्त क्षेत्रबाट लड्ने औपचारिक निर्णय गरेको छ । 

राउतले आफैंले पनि उक्त क्षेत्रबाट लड्ने लोकान्तरलाई संक्षिप्त प्रतिक्रिया दिएका छन् । उक्त क्षेत्रबाट अघिल्लो निर्वाचनमा जनता समाजवादी पार्टीको कार्यकारिणी समिति अध्यक्ष उपेन्द्र यादव प्रतिनिधि सभामा निर्वाचित भएका थिए ।

‘मेरो आफ्नो जन्मस्थान महादेवा पनि सोही क्षेत्रमा भएका कारण आफ्नो जन्मस्थानबाट चुनाव लड्दैछु,’ राउतले लोकान्तरसँग भने, ‘उपेन्द्रजी त संसदीय क्षेत्र फेरिरहनु हुन्छ तर मैले पहिलो पटक आफ्नो जन्मस्थानबाट चुनाव लड्ने कुरा गरेको हो ।’

राउत संसदीय राजनीतिमा पहिलोपटक चुनावी प्रतिस्पर्धामा आउन लागेका हुन् । यसअघि स्थानीय तहको निर्वाचनमा जनमत पार्टीले भाग लिए पनि संसदीय राजनीतिमा भने पहिलो पटक निर्वाचनमा भाग लिँदैछ ।

जसपा अध्यक्ष यादवको नागरिकतामा जन्मस्थान सप्तरी भए पनि विगतमा उनी सुनसरी र मोरङबाट चुनाव लड्ने गरेका थिए ।