प्रहरीले गोकर्णेश्वर नगरपालिका–६ नयाँ बस्तीसर्वेश्वर मार्गस्थित एक कारखानाबाट नक्कली कस्मेटिक्स सामान बरामद गरेको छ । दीपिका अग्रवालको नाममा दर्ता रहेको मिसेल कस्मेटिक्स प्रालिको कारखानामा छापा मारी प्रहरीले बिहीवार नक्कली कस्मेटिक्स सामान बरामद गरिएको हो । 

उक्त कारखानामा नक्कली कस्मेटिक्स सामानहरू उत्पादन गरिरहेको सूचनाका आधारमा जिल्ला प्रहरी परिसर काठमाडौं, प्रहरी वृत्त वौद्ध, बाणिज्य आपूर्ति तथा उपभोक्ता संरक्षण विभागबाट संयुक्त रूपमा खटिएको टोलीले छापा मारेको हो । उक्त कारखानाबाट स्याम्पु, हेयर ट्रिटमेन्ट क्रिम, हेयर आयललगायत नक्कली सौन्दर्यका सामान उत्पादन भइरहेको प्रहरीको निष्कर्ष छ । 

उक्त कारखानाबाट नक्कली उत्पादनमा गर्न प्रयोग हुने कच्चा पदार्थ, तयारी अवस्थाको नक्कली सामानसमेत फेला परेको प्रहरीले बताएको छ । उक्त कारखानाबाट तयारी अवस्थाका स्याम्पु, कपालमा लगाउने तेल, क्रिमलगायत ठूलो मात्रामा बरामद भएको प्रहरीले जनाएको छ । 

त्यस्तै, क्रिम बनाउने कच्चा पदार्थ भएको सेतो ५० लिटरको ड्रम १ सय ६० थान, कच्चा पदार्थ भएको २५ केजीको बोरा २० थान, मिक्सर मेसिन ४ थान, टेपिङ मेसिन,  फिलिङ मेसिन, प्याकिङ्ग मेसिन, लेबलिङ मेसिन, फिल इन मेसिन र मिति छाप्ने मेसिनसमेत बरामद भएको छ ।  

बाणिज्य आपूर्ति तथा उपभोक्ता संरक्षण विभागले थप अनुसन्धानका लागि उक्त कारखाना सिल गरेको जिल्ला प्रहरी परिसर काठमाडौंले जनाएको छ  ।