गत बिहीवारको मन्त्रिपरिषद्को बैठकबाट बर्खास्तमा परेको नेपाल वायुसेवा निगमका कार्यकारी अध्यक्ष युवराज अधिकारी नियमित काममा फर्किएका छन् । सरकारले कार्यक्षमताको अभाव र निगमका लागि अयोग्य व्यक्ति भएको निष्कर्ष निकाल्दै बर्खास्त गरेका अधिकारी आइतवार बिहान पौने ११ बजे नियमित झै कार्यकक्ष प्रवेश गरेका छन् । 

अधिकारीलाई सरकारले छानबिन समिति गठन गरेर विभिन्न २२ कारण औँल्याउँदै बर्खास्त गरेको थियो । सरकारले वर्खास्त गरेकै दिन सर्वोच्च अदालतले त्यसअघिको मुद्दामा पर्यटनमन्त्रीलाई ७ दिनभित्र लिखित स्पष्टीकरणसहित उपस्थित हुन आदेश दिएको थियो । 

कार्यकारी अध्यक्ष अधिकारीलाई पदबाट नहटाउन सर्वोच्च अदातले अन्तरिम आदेशको कार्यान्वयनमा अटेर गरेको भन्दै पर्यटनमन्त्री जीवराम श्रेष्ठलाई अदालतको अवहेलनाको मुद्दामा उक्त आदेश दिएको थियो । 

निगमका एक कर्मचारीका अनुसार पुरानै मुद्दामा दिएको आदेशलाई आधार बनाएर अधिकारी आइतवार कार्यालय आएको हुनसक्छ । ‘के भएको रहेछ बुझेर मात्रै भन्न सकिन्छ’, उनले भने ।

वायुसेवा निगमका कर्मचारी संघका अध्यक्ष मानबहादुर कुँवरले भने  ‘अधिकारीले सरकारबाट बर्खास्त भएको जानकारी नभएकोले नियमित काममा आएको भनेका छन् ।’ अधिकारीले कार्यालयमा आएर भटाभट फाइल सदर गरिरहेकोले उनलाई काम गर्न दिनबाट रोक्ने कुँवरको भनाइ छ । ‘बर्खास्तमा परेको व्यक्तिले काम गर्न पाउँदैनन्, अधिकारीले नमाने कार्यकक्षमा तालाबन्दी गर्नेसम्मको तयारी भएको छ’ यो विषयमा निगमका कर्मचारीसँग छलफल गर्दैै छौं,’ कुँवरले भने ।

अधिकारीलाई ४ वर्षको लागि नियुक्त गरेको सरकारले पहिलोपटक असार ९ मा निलम्बन गरेको थियो । तर, उक्त निर्णयविरुद्ध अदालत गएपछि उनलाई नहटाउन अदालतले अन्तरिम आदेश दिएको थियो । त्यसपछि उनी पुनः वायुसेवा निगम फर्किएका थिए । अधिकारीको मुद्दा अदालतमै विचारधीन भएकोले सोको अन्तिम फैसला नहुँदै सरकारले अधिकारीलाई हटाएर महाप्रबन्धकमा दीपुराज ज्वारचनलाई दिएको अस्थायी नियुक्ति कार्यान्वयन नगर्न पनि आदेश थियो । त्यो आदेश अघिल्लै मुद्दाको लागि भएको भन्दै सरकारले भने अधिकारीलाई पुनः हटाएको थियो ।