नेकपा एमालेका उपमहासचिव प्रदीप ज्ञवालीले चुनाव मिति घोषणा भएसँगै कामचलाउमा रुपान्तरित भएको सरकारले संसदमा नयाँ बिजनेश ल्याउन नमिल्ने बताएका छन् । कामचलाउमा रुपान्तरित भएको सरकारले नियमित सरकारले जस्तो बिजनेस ल्याउन नमिल्ने उनको भनाइ छ ।

आइतवार बसेको प्रतिनिधि सभा बैठकको विशेष समयमा ज्ञवालीले निर्वाचन मिति घोषणा भइसकेपछि सरकारले संसदमा नयाँ विधेय ल्याउन नमिल्ने बताएका हुन् । ‘निर्वाचन मिति घोषणापछि सरकार कामचलाउ भयो । कामचलाउ सरकारले सदनलाई बिजनेस दिन मिल्छ र ? नयाँ विधेयक दर्ता भयो त्यो विधेयक प्रश्न गर्ने, त्यो स्थिति बन्छ ?’ ज्ञवालीले प्रश्न गरे ।

एमाले सांसद ज्ञवालीले प्रधानन्यायाधीश चोलेन्द्रशमशेर जबराविरुद्धको महाभियोगमा राजनीतिक प्रतिशोध देखिएको आरोप लगाए । ‘आज संसदको कार्यसूचीमा महाभियोगबारे छलफल गर्ने रहेछ । तीन महिनामा छिनोफानो हुनुपर्नेमा यतिका समय चुप लागेर बस्ने । तर, कस्तो देखियो भने नियम भने जसरी पनि अमुक व्यक्तिलाई निलम्बन गर्नैपर्ने । पाँच महिना संसदमा अड्काएर राखेको महाभियोग अब सदनको बिजनेस सकिने बेलामा हामीले न्याय गर्दैछौँ ?’ ज्ञवालीले प्रश्न गरे ।