नेपाली चलचित्र ‘झिंगेदाउ’को ट्रेलर सार्वजनिक गरिएको छ । 

आइतवार राजधानीमा एक कार्यक्रमबीच केकी अधिकारी र आँचल शर्मा स्टारर चलचित्रको ट्रेलर सार्वजनिक गरिएको हो । 

ज्ञानेन्द्र देउजाको निर्देशनमा भीमनीधि तिवारीको कथा कृतिमा आधारित रहेर चलचित्र ‘झिंगेदाउ’ निर्माण भएको हो ।

चलचित्रको सार्वजनिक ट्रेलरमा अत्यन्तै मिल्ने २ दाजुभाइको जीवनमा विवाहपछि आउने उतारचढावलाई प्रस्तुत गरिएको छ । ट्रेलरमा चलचित्रका मुख्य कलाकारहरू अभिनेत्रीद्वय केकी र आँचलका साथमा अभिनेता मुकुन भुसाल, नवअभिनेता कुशल विष्ट, चरित्र अभिनेत्री हिउँवाला गौतम लगायत चित्रित छन् । केकी र आँचल चलचित्रमा जेठानी–देवरानी, मुकुन र कुशल दाजुभाइको भूमिकामा प्रस्तुत छन् ।

भदौ १७ गतेबाट प्रदर्शनमा आउने चलचित्र कपनगडी सिनेमा र क्रिउ नेपालको ब्यानरमा निर्माण भएको हो । 

ट्रेलर सार्वजनिक कार्यक्रममा निर्देशक देउजाले ४–५ पानाको कथामा केन्द्रित रहेको चलचित्र निर्माण गरेको बताए । थुप्रै सफल चलचित्र एवं ‘मुनामदन’ जस्तो ऐतिहासिक चलचित्र दिएका देउजा ‘झिंगेदाउ’मार्फत ७ वर्षपछि निर्देशनमा कमब्याक गरेका हुन् ।

आफूले यथार्थपरक, मौलिक चलचित्र निर्माण गरेको बताउँदै चलचित्रलाई दर्शकले रुचाउने बताए ।

 
अभिनेत्री केकीले ‘झिंगेदाउ’ कृतिमा आधारित आफ्नो दोस्रो चलचित्र भएको बताइन् । यसअघि कृतिमा आधारित ‘मसान’ चलचित्रमा केकीले ‘झिंगेदाउ’ मौलिक चलचित्र बनेको बताइन् । अभिनेत्री आँचलले फरक खालको चलचित्रमा आफूले पहिलोपटक काम गरेको बताउँदै एकदमै उत्साहित रहेको सुनाइन् । 

अभिनेता मुकुन र नवअभिनेता कुशलले पनि चलचित्रमा काम गर्दाको अनुभव शेयर गर्दै माया गरिदिन आग्रह गरे । 

प्रदीप भारद्वाजको पटकथा तथा संवाद रहेको ‘झिंगेदाउ’मा सुलभ प्रतीक देउजा र समीक्षा देउजा निर्माताको रूपमा छन् । अर्जुन पोखरेलको संगीत रहेको चलचित्रमा विष्णु कल्पितको छायांकन र मित्र गुरुङको सम्पादन छ ।

चलचित्रमा समावेश गीत ‘आगो विना बिँडी जल्दैन’ यसअघि हिट भइसकेको छ ।