विराटनगर । नेकपा एमालेका महासचिव शंकर पोखरेलले संसदमा अगाडि बढेको प्रधानन्यायाधीश महाअभियोग प्रकरणमा एमालेले सत्ता गठबन्धनले ल्याएका प्रमाणहरू अध्ययन गर्ने बताएका छन् ।

विराटनगर विमानस्थलमा सञ्चारकर्मीहरूसँग कुरा गर्दै  पोखरेलले आफू चोखो हुँ भनेर देखाउनका लागि सत्ता गठबन्धनले प्रधानन्यायाधीशमाथि महाअभियोग लगाएको समेत आरोप लगाए । 

अहिलेको महाअभियोग प्रकरणमा प्रधानमन्त्री स्वच्छ हुने प्रधानन्यायाधीश चाहिँ मुछिने भन्ने अवस्था नदेखिएको समेत उनले बताए ।

महासचिव पोखरेलले चुनाव घोषणा भएपछि संसद् स्वतः निष्क्रिय हुनुपर्ने भए पनि सङ्कटका बेला काम लाग्छ भन्ने हिसाबले गठबन्धनले अगाडि बढाएको उनले बताए । 

गठबन्धनसँग एमाले एक्लै लड्न तयार रहेको समेत उनले बताएका छन् ।

स्थानीय तहको निर्वाचनमा काँग्रेसले चतुरियाई गरेको समेत उनले बताए ।

‘२० प्रतिशतमा काँग्रेसले एक्लै लड्ने रणनीति बनायो । अन्य दललाई एमालेसँग मिल्न पाइँदैन भन्यो । ४० प्रतिशतमा उसले सहयोगी खोज्यो । आफू कमजोर भएका ठाउँमा उनले सहयोगी खोजेको देखिन्छ । अन्य ४० प्रतिशत प्रतिस्पर्धा भने झन् रोचक बन्यो,’ उनले भने,‘सबै दलको गठबन्धन ४० प्रतिशतमा भएको देखिन्छ त्यसमा ४१ प्रतिशत एमालेले जितेको थियो ।’ 

स्थानीय तहको मत परिणाम हेर्दा पनि पूर्ण गठबन्धनले ल्याएको मत अहिले एमालेले ल्याउने महासचिव पोखरेलको दावी छ  ।

काँग्रेसले नीतिगत नेतृत्वको सामथ्र्य गुमाएको आरोप लगाएका छन् । 

‘नेपाली काँग्रेसबाट नेपाली जनताले नीतिगत नेतृत्व अपेक्षा गर्न सक्दैनन्,’ उनले भने,‘अहिलेको गठबन्धन भनेको नीति विहीनता, अवसर वाद र स्वार्थको हो भन्ने पुष्टि भएकाले काँग्रेस प्रति जनताको मोह छैन ।’

एमालेले सरकार छोड्दा मुलुकका शोधान्तर स्थिति बचतको अवस्थामा रहेको उनले बताएका छन् ।

‘शोधान्तर स्थिति ७०/८० अर्ब बचत रहे पनि अहिले पौने ३ खर्व घटेको देखिन्छ,’ उनले भने ‘वैदेशिक मुद्राको संचिति ११ महिनाको वस्तु र सेवा आयत गर्ने अवस्था थियो । अहिले घटेर ६ महिनामा आइपुगेको छ । यही सरकार १ वर्षसम्म रहिरहने हो भने श्रीलङ्का जस्तो अवस्थामा पुग्न सक्थ्यो । अगाडि नै चुनाव घोषणा गरेकाले अब चुनाव पछि एमालेको नेतृत्वको सरकारले सुधार गर्छ,’ उनले भने ।