समसामयिक विषयवस्तुमा तीज गीत ‘भाउ बढ्यो’ रिलिज

समसामयिक विषयवस्तुमा आधारित रहेर तीज गीत ‘भाउ बढ्यो’को निर्माण गरिएको छ । युवापुस्ताका गायक अर्जुन सापकोटा र चल्तापुर्जा भिडियो निर्देशकसमेत रहेकी स्मृति तिमिल्सिना ‘गुरुआमा’को स्वर रहेको गीतको भिडियो आइतवार राति युट्युबमा सार्वजनिक गरिएको छ । सञ्चारकर्मीसमेत रहेका सुमन ढकालले गीतको शब्द कोरेका हुन् । गायक सापकोटाकै संगीत एवं हुकलाइन रहेको गीतलाई विश्वास नेपालले एरेन्ज गरेका हुन् । 

गीतमा नेपालमा दिनहुँ भइरहेको मूल्यवृद्धिलाई विषयवस्तु बनाइएको छ । स्मृतिकै निर्देशनमा तयार भिडियोमा उनी स्वयंसँगै अर्जुन सापकोटा र सुमन ढकालको अभिनय छ । दिदी–भाइको भूमिकामा प्रस्तुत स्मृति र अर्जुनले डिजेल, पेट्रोललगायत विभिन्न क्षेत्रमा भएको मूल्यवृद्धिले पारेको प्रभावका विषयमा आ–आफ्नो पीडा पोखेका छन् । 

सुुरेश श्रेष्ठको छायाँकन रहेको भिडियो प्रकाश धमलाको सम्पादनपछि ‘अर्जुन सापकोटा’ युट्युब च्यानलमार्फत सार्वजनिक भएको हो । स्रोता दर्शकले गीतलाई ‘समय सान्दर्भिक’ भनेर प्रतिक्रिया दिएका छन् । प्रारम्भिक प्रतिक्रियाले गायक सापकोटा खुशी छन् ।