नेपाली कांग्रेसका दोस्रो तहका नेताहरूले बहुमत सिट आफूसँग राखेर मात्र गठबन्धनमा सिटसंख्या बाँड्न प्रधानमन्त्री एवं सभापति शेरबहादुर देउवालाई सुझाव दिएका छन् । प्रतिनिधि सभाका १ सय ६५ सिटमध्ये कांग्रेसले १०० आफूसँग राखेर बाँकीमा तालमेल गर्न उनीहरूले नेतृत्वलाई सुझाव दिएका हुन् । 

प्रधानमन्त्री निवास बालुवाटारमा सोमवार बिहान भएको छलफलमा पूर्वपदाधिकारी र प्रभावशाली नेताहरूले बहुमत सिट आफूसँग राख्न आग्रह गरेका थिए । चुनावी तालमेलको विरोध गर्ने नेताहरूलाई केन्द्रीय समिति बैठकमा हकारेका देउवाले सोमवार भने अरुको कुरा सुनेका थिए । 

गठबन्धनमा चुनावी तालमेल गरेर अघि बढ्ने औपचारिक निर्णय भएकोले सिट संख्या कसरी बाँड्ने भन्ने विषयमा राय लिन बोलाइएको देउवाले बताएका थिए । 
‘सभापतिज्यू धेरै बोल्नु भएन, नेताहरूले सय सिटमा कांग्रेसले दाबी छाड्नु हुन्न भन्ने भनाइ राख्नुभयो’ बैठकमा सहभागी एक नेताले लोकान्तरसँग भने । देउवा भने गठबन्धनका अन्य दललाई सम्मानजनक हिस्सा दिने पक्षमा रहेको ती नेताले बताए ।

सिट बाँडफाँटबारे सहमति गर्न गठित पाँच दलीय कार्यदलको बैठकअघि कांग्रेसले आन्तरिक छलफल गरेको हो । कार्यदलको बैठक सोमवार अपराह्न बस्दैछ । कार्यदलमा कांग्रेसको तर्फबाट महामन्त्री गगन थापा, नेता कृष्ण सिटौला र सञ्चारमन्त्री समेत रहेका केन्द्रीय सदस्य ज्ञानेन्द्रबहादुर कार्की सदस्य छन् । 

सरकारले मंसिर ४ गतेका लागि प्रतिनिधि सभाको चुनाव मिति घोषणा गरेसँगै दलहरू चुनावी तयारीमा लागेका छन् ।