सप्तकोशी नदी गाउँमा पस्दा विस्थापित बनेकाहरू अझै घर फर्कन सकेका छैनन् ।

उदयपुरको बेलाका नगरपालिका–८ डुम्रिबोटेबाट साउन १८ मंगलवार  राति कोशी बस्तीमा पसेपछि विस्थापित बनेका ३ सयभन्दा बढी घर जान नसकेका हुन् । 

वडा नंं ३, ५, ८ र ९ का दुई हजार पाँच सय परिवार विस्थापित भएका थिए । 

उनीहरूमध्ये दुई हजार परिवार घर फर्किए पनि १ सय सय परिवारका ३ सय भन्दा बढी पीडितहरू अझै घर फर्कन नसकेको बेलका नगरपालिकाका मेयर अशोक कार्कीले बताए । 

बेलका नगरपालिका वडा नं. ८ को सेतीखोला माध्यमिक विद्यालय ३ कठ्ठे चौरीमा  नगरपालिकाले बाख्रा पाल्न बनाएको खोरमा र बेलका क्याम्पसमा उनीहरू बसिरहेका छन् । 

खोलामा पानीको सतह घटे पनि बेलका ३ को एविसि टापुमा पानी पसिरहेकाले उनीहरूलाई घर पठाउन समस्या भएको मेयर कार्कीले बताए ।  

यसैगरी बाढी पहिरोको निरीक्षणमा निस्केका मुख्यमन्त्री राजेन्द्र राईसँग बाडीपीडितहरूले सहयोग दीर्घकालीन योजना खोजी गरी दिन आग्रह गरेका छन् ।

‘सरकारले दीर्घकालीन योजना ल्याए हामी पटक पटक कोशीका पीडित भन्नु पर्दैन थियो,’ यशोदा कामतले भनिन्,‘नत्र बाढी आए नै पिच्छे घर छाडेर हिँड्नुको हाम्रो विकल्प केही छैन ।’ 

‘एक वर्ष हामी संघर्ष गरेर खाउँला । अहिलेको बाढीले घर बाहेक सबै बगायो । १ बिगाहामा लगाएको धान बारीमा कम्मर भन्दा माथि माथि पानी छ । तर पनि हामी एक वर्ष जसरी पनि गरी खान्छौ  । बनीबुतो गरेर खान तयार छौ । हामीलाई बर्खा लाग्न साथ अब कहिले कोसी आउँछ भनेर दिनरात खोला तिर आँखा लगाएर बस्नु नपरोस् । सरकारले तटबन्ध गरिदिए  हामीलाई  केही दिनु पर्दैन,' कोसी पीडित प्रकाश माझीले भने । 

पीडितहरूको गुनासो सुनेपछि मुख्यमन्त्री राईले दीर्घकालीन योजनाको लागि काम गर्ने बताएका छन् ।

‘भारतसँग भएको कोसीको सन्धि सम्झौताका बारेमा प्रधानमन्त्रीलाई भेटेर जानकारी गराउँछु,’ उनले भने,‘संघीय सरकारले कूटनीतिक छलफल गरेर हामीलाई अधिकार दिए तत्काल कोशी बस्तीमा पसेको ठाउँमा रोकथाम गर्न सकिन्छ ।’

प्रदेश सरकारले विस्थापित बनेकाहरूलाई खान बस्नेको जिम्मा प्रदेश सरकारले गर्ने समेत बताएका छन् । 

कोभिड सङ्क्रमणबाट मुक्त भएपछि पीडितको गुनासो सुन्न पुगेका मुख्यमन्त्री राईले मेसमा पकाएको खाना पनि खाएका थिए ।