कृषि तथा पशुपंक्षी विकासमन्त्री मृगेन्द्रकुमार सिंह यादवले सरकारले कृषिमा आवश्यक लगानी गर्न नसकेको गुनासो गरेका छन् । बिहीवार खाद्यका लागि कृषि अभियानले बुझाएको ध्यानाकर्षण पत्र बुझ्दै सरकारले अहिले कृषिमा गरिरहेको लगानीले आवश्यक्तालाई परिपूर्ति गर्न नसक्ने बताए । 

मन्त्री यादवले नेपाल कृषिप्रधान देश र अधिकांश नागरिक कृषिमा आश्रित रहे पनि सरकारले कृषि क्षेत्रको प्रवद्र्धन र विकासका लागि आवश्यक लगानी गर्न नसकेको बताए । उनले किसानहरूले प्राङ्गारिक मलमा जोड दिनुपर्ने ठाउँमा रासायनिक मलमा जोड दिइरहेको बताए । उनले किसानले प्राङ्गारिक मलमा जोड दिएर रासायनिक मलको प्रयोग कम गर्नुपर्ने बताए । 

रासायनिक मलका कारण बढी मात्रामा विदेशमा पैसा बाहिरिएको भन्दै नागरिकमा प्राङ्गारिक मलको प्रयोगको बारेमा सचेतना फैलाउन आवश्यक रहेको मन्त्री यादवको भनाइ छ । ‘रासायनिक मलका कारण हाम्रो मुद्रा बाहिर गइरहेको छ, यसलाई प्राङ्गारिक मलको प्रयोग गरेर रोक्नुपर्ने आवश्यक छ । प्राङ्गारिक मलको प्रयोग गर्ने हो भनेपनि हाम्रो मुद्रा सञ्चिति हुन्छ,’ उनले भने । 

खाद्यका लागि कृषि अभियानले खाद्य अधिकार तथा खाद्य सम्प्रभुता सम्बन्धी ऐन र नियमावली जारी गर्न माग गरेको छ । संविधानले खाद्य अधिकारलाई मौलिक हकका रूपमा ज्ञारेन्टी गरिसकेको भन्दै अभियानले खाद्य अधिकार तथा खाद्य सम्प्रभुता सम्बन्धी ऐन २०७५ जारी भएपछि नियमावली नबन्दा कार्यान्वयनमा आउन नसकेको भन्दै मन्त्री यादवको ध्यानाकर्षण गराएको हो । 

अभियानले प्राङ्गारिक कृषि प्रवद्र्धन आधारपत्रअनुसार प्राङ्गारिक कृषिको विकास गर्न ‘प्राङ्गारिक उच्चस्तरीय आयोग’ले सिफारिस गरेको सुझाव कार्यान्वयन गर्न पनि सरकारको ध्यानाकर्षण गराएको छ । त्यस्तै, संघीय सरकारले कृषि नीति नबनाएको कारण प्रदेश र स्थानीय सरकार अलमलमा परिरहेको भन्दै अभियानले एकीकृत कृषि नीति निर्माणमा ध्यान दिन आग्रह गरेको छ ।