लुम्बिनीमा पाँच दलीय गठबन्धन सरकारले एक वर्ष पूरा गरेको छ । २०७८ साउन २८ गते नेकपा माओवादी केन्द्रका नेता कुलप्रसाद केसीको नेतृत्वमा पाँच दलीय गठबन्धन सरकार बनेको थियो । गठबन्धन सरकारले एक वर्षमा प्रदेशबासीलाई उत्साही बनाउन सफल भएको दाबी गरेको छ । 

लुम्बिनी सरकारका प्रवक्ता एवं आन्तरिक मामिला, कानून तथा सञ्चारमन्त्री तिलकराम शर्माले आइतवार पत्रकार सम्मेलन गरी सरकार सफल भएको दाबी गरेका छन् । गठबन्धन सरकारले प्रदेशको स्थायी राजधानी तोकिएको दाङ, राप्ती उपत्यकामा राजधानी निर्माणका लागि गुरु योजना तयार गरेको, राजधानी व्यवस्थापनका लागि ल्याण्ड पुलिङको कार्य अगाडि बढाइएको र लालमटियामा प्रदेश सभा भवन निर्माणलाई महत्वपूर्ण उपलब्धीका रूपमा प्रस्तुत गरेको छ । 

५२ बुँदे प्रगति विवरणमा अधिकांश प्रगतिमा राजधानीसँग सम्बन्धित पहलकदमीलाई सरकारले उल्लेख गरेको छ । राप्ती प्राविधिक शिक्षालयको १८ बिगाह जग्गाभित्र ८ वटा प्रशासनिक भवन निर्माण कार्य अगाडि बढाइएको सरकारले जनाएको छ । प्रदेशका १०९ वटै स्थानीय तहमा मुख्यमन्त्री शैक्षिक सुधार कार्यक्रम घोषणा भई लागू हुनुलाई पनि लुम्बिनी सरकारले उपलब्धी मानेको छ । राप्ती उपत्यकामा प्रदेश राजधानी निर्माण, लुम्बिनी प्रादेशिक अस्पताल, लुम्बिनी प्राविधिक विश्वविद्यालय र रामपुर, पाल्पादेखि रोल्पा सडक आयोजनालाई प्रदेश गौरवको आयोजना घोषणा गर्नुलाई पनि उपलब्धीका रूपमा उल्लेख गरेको छ । 

मुटु, मृगौला र क्यान्सर रोगीहरुलाई प्रदेश सरकारले २ लाखसम्म प्रतिव्यक्ति उपचार सहायता उपलब्ध कार्यक्रमबाट २७६ जनाले सहायता प्राप्त गरेको प्रवक्ता शर्माले बताए । गठबन्धन सरकारले प्रदेशका २२३ कि.मि. सडक कालोपत्रे, २६५ किमि ग्राभेल र १२१ कि.मी नयाँ ट्रयाक खोलेको जनाएको छ । ३७० हेक्टर जमिन तटबन्धन मार्फत जमिन उकास गरिएको, विपद् व्यवस्थापनतर्फ ७५३ घरपरिवारलाई थप राहत प्रदान गरेको, १५३ क्षतिग्रस्त घरको पुनर्निर्माणमा सहायता उपलब्ध गराएको, जनयुद्धका घाइते तथा अपाङ्गहरूको उपचारको व्यवस्था, पत्रकार दुर्घटना बीमालाई सरकारले महत्वपूर्ण उपलब्धी मानेको छ । प्रदेश प्रहरी ऐन, प्रदेश वन ऐन, सञ्चार माध्यम ऐन जारी भई कार्यान्वयनमा लगिएको मन्त्री शर्माले बताए ।  १२ वटा जिल्लामा १÷१ वटा नमूना शहरको निर्माणका लागि आवश्यक प्रक्रिया समेत सरकारले अगाडि बढाएको बताएको छ । 

सरकारले प्रदेशका १०९ ओटै स्थानीय तहमा ४३६ जना कृषि प्राविधिक जनशक्ति करार सेवामा भर्ना गरेकोलाई पनि उपलब्धीका रूपमा दर्शाएको छ । नेपालमा नै पहिलो पटक कपिलवस्तुको जगदीशपुर ताललाई चरा संरक्षित क्षेत्र घोषणा, थप २ जिल्लामा यातायात व्यवस्था सेवा कार्यालय विस्तारलाई पनि मन्त्री शर्माले उपलब्धीका रूपमा उल्लेख गरेका छन् । मन्त्री शर्माले संघीयता ठूलो बलिदान र आन्दोलनबाट प्राप्त भएकाले गठबन्धन सरकार त्यसलाई बलियो बनाउन लागि परेको समेत बताए । 

अर्थसचिव नेत्रप्रसाद सुवेदीले प्रदेश सरकारको खर्च आन्तरिक आम्दानीले धान्न नसक्ने जानकारी दिए । आर्थिक वर्ष २०७८÷७९ मा आर्थिक वृद्धिदर ५.३६ प्रतिशतले प्रतिव्यक्ति आय र ११०३ यूयस डलर राष्ट्रिय कुल गार्हस्थमा १४.१ प्रतिशत योगदान रहेको प्रगति विवरणमा उल्लेख छ ।