काठमाडौं उपत्यकामा जम्मा भएको फोहोर उठाउनेबारे पहल गर्न सत्ता गठबन्धनका नेताहरूले प्रधानमन्त्रीको ध्यानाकर्षण गराएका छन् । आइतवार प्रधानमन्त्री निवास बालुवाटारमा बसेको गठबन्धनको बैठकले फोहोर उठाउन र महँगी नियन्त्रण गर्न सरकारको ध्यानाकर्षण गराउने निर्णय गरेको गठबन्धनका एक नेताले जानकारी दिए । 

काठमाडौंको फोहोर उठाउने बारे काठमाडौं महानगरपालिकाका मेयर बालेन्द्र साह (बालेन)सँग कुरा गर्न पनि गठबन्धनका नेताहरूले प्रधानमन्त्री देउवालाई सुझाव दिएका छन् । ‘काठमाडौंको फोहोर नउठेको विषयमा सरकार टुलुटुलु हेरेर बस्न मिल्दैन । धेरै समय फोहोर नउठ्दा महामारीको समस्या सिर्जना हुनसक्छ । फोहोर उठाउन सरकारले पूर्णरुपमा ध्यान दिएर मातहतका निकायलाई परिचालन गर्न सरकारको ध्यानाकर्षण गराउने निर्णय भएको छ’, बैठकमा सहभागी एक नेताले भने । 

त्यसैगरी, गठबन्धन बैठकले मूल्यवृद्धि नियन्त्रणका पहल गर्न पनि सरकारलाई सुझाव दिएको छ । बजारमा भएको मूल्यवृद्धिले जनताको चुल्होमा समस्या सिर्जना भएको र नियन्त्रणका लाग बजार अनुगमन र नियमन गर्न सरकारलाई सुझाव दिने निर्णय भएको उनले बताए ।

लामो समयदेखि काठमाडौंको फोहोर नउठ्दा शहरका सडकमा फोहोर थुप्रिएको छ । फोहोरको डंगुर कुहिन थाल्दा काठमाडौं शहर नै दुर्गन्धित भइरहेको छ । 

बञ्चरेडाँडाका स्थानीयले फोहोर फाल्न निरन्तर अवरोध गरिरहेका छन् ।