अख्तियार र मन्त्रालयका सचिवहरूबीच छलफल, सार्वजनिक सेवामा दूरदर्शी बन्न सुझाव

अख्तियार दुरुपयोग अनुसन्धान आयोगले आइतवार विभिन्न मन्त्रालयका सचिव तथा विभागीय प्रमुखहरूसँग अन्तरक्रिया गरेको छ । अख्तियारले सार्वजनिक सेवा प्रवाह र विकास निर्माणका कार्यहरूको प्रभावकारिताका सम्बन्धमा नेपाल सरकारका सचिव तथा विभागीय प्रमुखहरूसँग अन्तरक्रिया कार्यक्रम गरेको हो । 

अन्तरक्रियामा राष्ट्रिय योजना आयोग, महालेखा नियन्त्रक कार्यालयसहित सबै मन्त्रालयका सचिव तथा मातहतका विभाग र सम्बन्धित निकायका प्रमुखहरू सहभागी भएको अख्तियारका प्रवक्ता श्यामप्रसाद भण्डारीले जानकारी दिए । 

छलफलपछि आयुक्तहरूले मन्त्रालयले विकास निर्माण र सार्वजनिक सेवा प्रवाहको हकमा दूरदर्शी भएर अघि बढ्नुपर्ने, जनशक्तिहरूलाई अतिरिक्तमा नराखी जिम्मेवारी दिनुपर्ने, कानून निर्माण गर्दाको समस्यामा ध्यान दिनुपर्ने सुझाव दिएका थिए ।  

अख्तियारका प्रमुख आयुक्त प्रेम कुमार राईले यस किसिमको अन्तरक्रियाले भ्रष्टाचार निवारण र सुशासन प्रवर्द्धनमा योगदान पु¥याउने बताए । हाल कार्यान्वयनमा रहेका सूचना प्रविधि सम्बन्धी सुधारलाई एकीकृत गर्नुपर्ने, मन्त्रालयमा रहेका अनुगमन तथा मूल्यांकन महाशाखालाई सवलीकरण गर्नुपर्ने र अनुगमनबाट प्राप्त प्रतिवेदनको प्रभावकारी कार्यान्वनयन गर्नुपर्ने उनले बताए । 

अख्तियारले बजार अनुगमन र विकास निर्माणको अनुगमनलाई छुट्टाछुट्टै रूपमा प्रभावकारी ढंगले सञ्चालन गर्न निर्देशन दिएको छ । 

अख्तियारले यस्तै छलफल यसअघि साउन २५ र २५ गते पनि आयोजना गरेको जानकारी दिएको छ ।