राप्रपा नेपालको केन्द्रीय समिती बैठक सोमवार काठमाडौंमा बसेको छ । काठमाडौंको सुकेधारास्थित नवदुर्गा पार्टी प्यालेसमा बसेको बैठकको उद्घाटन गर्दै अध्यक्ष कमल थापाले उत्साह, ऊर्जा र उच्च मनोबलसहित निर्वाचनमा केन्द्रित हुन आग्रह गरेका छन् । 

अध्यक्ष थापाले मुलुकको पछिल्लो अवस्थाबारे संक्षिप्त भनाइ राखेका छन् । बैठकमा उनले वर्तमान राजनीतिक परिस्थिति तथा भावी कार्यदिशाका सम्बन्धमा कार्यपत्र प्रस्तुत गरेका छन् । 

महामन्त्री भाष्कर भद्राले सचिवालय सम्बन्धी प्रतिवेदन, महामन्त्री सुशील श्रेष्ठले मेची–महाकाली राष्ट्रिय स्वाभिमान यात्रा र प्रशिक्षण सम्बन्धी प्रतिवेदन, अर्का महामन्त्री राजाराम बर्तौलाले सांगठानिक प्रतिवेदन, कोषाध्यक्ष ज्ञानेन्द्र कार्कीले आर्थिक प्रतिवेदन पेश गरेका छन् । 

बैठकमा प्रदेश अध्यक्षहरूको पनि प्रतिवेदन प्रस्तुत गर्ने कार्यतालिका रहेको महामन्त्री राजाराम बर्तौलाले जानकारी दिए । बैठकमा निर्वाचनको तयारी र आवश्यक रणनीति निर्माण गर्ने विषयमा छलफल हुने उनले बताए । प्रस्तुत कार्यपत्र र प्रतिवेदनमाथि केन्द्रीय सदस्यहरूले टिप्पणी गर्नेछन् । बैठक मंगलवारसम्म जारी रहने प्रवक्ता सुरेश आचार्यले जानकारी दिए ।