तीज गीत ‘चरी जेलैमा २’ सार्वजनिक भएसँगै लोक गायिका विष्णु माझी फेरि चर्चामा छिन् । 

यसपटक उनको गीतलाई लिएर तारिफ मात्र भने भएको छैन, केही आलोचनाहरूसमेत देखिएका छन् । 

विगतको हिट गीत ‘चरी जेलैमा’कै शैलीमा ‘चरी जेलैमा २’ल्याएपछि केही दर्शक/स्रोताहरूबाट आलोचना भएको हो । 

यद्यपि, विष्णुकै स्वरको भने सबैले खुलैरै प्रशंसा गरेका छन् । 

गीतले युट्युबमा राम्रो ‘भ्युज’ पाइरहेको छ । सार्वजनिक भएको ५ दिनमा उक्त गीतको भिडियोलाई ३० लाख बढीले हेरिसकेका छन् । 

सांगीतिक बजारमा माझीका दर्जनौं गीत कर्णप्रिय एवं लोकप्रिय छन् ।

हामी यहाँ उनका करोड बढी हेरिएका ८ गीतबारे जानकारी दिँदैछौं । 

सालको पातकाे टपरी: ८ करोड ३ लाख भ्युज

‘सालको पातकाे टपरी’ विष्णु माझीको स्वर रहेको मध्येको सर्वाधिक हिट गीत हो ।

उनको स्वर रहेकोमध्ये सर्वाधिकमात्र होइन लोकदोहोरीको इतिहासमै सर्वाधिक भ्युज पाउने गीत पनि हो यो ।

चार वर्षअघि सार्वजनिक यस गीतमा विष्णु र कुलेन्द्र विश्वकर्माको स्वर छ । 

यो गीतको भिडियोले युट्युबमा ८ करोड ३ लाख बढी भ्युज पाएको छ । 

नवराज पन्तको शब्द, वसन्त थापाको संगीत रहेको यस गीतमा आशिष अविरलको संगीत संयोजन छ । 

चल्तापूर्जा निर्देशक शिव बि.क.को निर्देशनमा यस गीतको भिडियो तयार भएको हो । 

भिडियोमा अभिनेत्री मरिष्का पोखरेल, गायक कुलेन्द्र विश्वकर्मा र संगीतकार वसन्त थापाको अभिनय छ ।

अभिनेत्री मरिष्कालाई चलचित्रले नदिएको चर्चा यस गीतले दिलाएको थियो । 

ज्ञानेन्द्र शर्माको छायाँकन रहेको भिडियोलाई निशान घिमिरेले सम्पादन गरेका हुन् । 

भिडियो वसन्त थापाको युट्युब च्यानलमार्फत हेर्न सकिन्छ । 

यो गीतले सर्वत्र चर्चा पाएसँगै गायिका माझीको गुमनाम जीवनबारे सर्वत्र चासो बढेको थियो । 

त्यसपश्चात विष्णुका श्रीमान सुन्दरमणि अधिकारी स्वयं स्याङ्जा प्रहरीमा पुगेर आफू र विष्णुको अवस्थाबारे बताउनुपरेको थियो । 

चरी जेलैमा: ३ करोड ९५ लाख भ्युज

विष्णु माझीको स्वरमा सार्वजनिक गत वर्षको तीज गीत हो ‘चरी जेलैमा’ ।

यो गीतले एक वर्ष नपुग्दै ३ करोड ९५ लाख बढी पाइसकेको छ । 

यस गीतले सार्वजनिक भएको छोटो समयमै (१३ दिनमै) युट्युबमा १ करोड भ्युज पाउन सफल भएको थियो । ‘पुतलीको भट्टी’ भाग १७ का रुपमा सार्वजनिक ‘चरी जेलैमा’मा विष्णुकै श्रीमान सुन्दरमणि अधिकारीको शब्द तथा संगीत छ । 

गीतमा विनोद बाजुरालीको एरेन्ज, महिमा आचार्यको कोरस गायन छ । 

शिव बि.क.को कोरियोग्राफीमा सुन्दरमणिले नै निर्देशन गरेको भिडियोमा ललिता पौड्यालको अभिनय छ । 

यस गीतलाई माझीको वास्तविक जीवनसँग मेल खाएको भनेर समेत हेरिएको थियो । 

शम्भु चालिसेको छायाँकन रहेको गीतको भिडियोमा सुजन शाहीको सम्पादन छ । 

लालुमै: ३ करोड ८६ लाख भ्युज

लालुमै– विष्णु माझीको करोड बढी हेरिएको अर्को गीत हो । 

तीन वर्षअघि सार्वजनिक यस गीतमा विष्णु र सन्दीप न्यौपानेको स्वर छ । 

शिव हमालको शब्द, संगीत र आशिष अविरलको संगीत संयोजन गीतको भिडियोले युट्युबमा ३ करोड ८६ लाख भ्युज पाएको छ । 

गायक सन्दीप न्यौपाने र सृष्टि खड्काको अभिनय रहेको गीतको भिडियो प्रकाश भट्टको निर्देशनमा बनेको हो । 

राजेश घिमिरेको छायाँकन, विष्णु शर्माको सम्पादन रहेको भिडियो गीतकार एवं संगीतकारको ‘शिव हमाल’ युट्युब च्यानलमा हेर्न सकिन्छ । 

बोकेझार: १ करोड ४० लाख भ्युज

‘बोकेझार’ शीर्षकको गीत झण्डै तीज वर्षअघि युट्युबमा सार्वजनिक भएको थियो । 

विष्णु माझी र बसन्त थापाको स्वर रहेको गीतलाई अहिलेसम्म युट्युबमा १ करोड ४० लाख बढी पटक हेरिएको छ । 

प्रल्हाद सुवेदीको शब्द, बसन्त थापाको संगीत, कृष्ण बि.के भान्जाको संगीत संयोजन रहेको गीतलाई थापाले नै  प्रस्तुत गरेका हुन् । 

सुनिल क्षेत्रीको कोरियोग्राफी एवं निर्देशनमा तयार भिडियोमा सुनिल स्वयंमका साथमा रक्षा श्रेष्ठ, श्रीकृष्ण बम मल्ल लगायतको अभिनय छ । 

नवराज उप्रेतीको छायाँकन रहेको यस भिडियोलाई विकास ज्ञवालीले सम्पादन गरेका हुन् । 

भिडियो ‘बसन्त थापा’ युट्युब च्यानलमा हेर्न सकिन्छ । 

छिप–छिपे पानीमा लेउ: १ करोड २१ लाख

‘छिप–छिपे पानीमा लेउ’ गीतमा विष्णु माझी र पिताम्बर जि.सी.को स्वर छ ।

गीतकार एकनारायण भण्डारीको युट्युब च्यानलमा तीन वर्षअघि सार्वजनिक गीतलाई अहिलेसम्म १ करोड २१ लाख बढीले हेरेका छन् । 

एकनारायण भण्डारीको शब्द, संगीत रहेको गीतमा आशिष अविरलको संगीत संयोजन छ । 

अभिनेता दीलिप रायमाझी र अभिनेत्री सुरक्षा पन्तको अभिनय रहेको भिडियोलाई प्रकाश भट्टले कोरियोग्राफी एवं निर्देशन गरेका हुन् । 

राजेश घिमिरेले खिचेको यस भिडियोलाई विष्णु शर्माले सम्पादन गरेका हुन् । 

पीँडालु: १ करोड ११ लाख भ्युज

‘पीँडालु’ शीर्षकको गीतमा विष्णु माझीसँगै गायक तेजश रेग्मीले स्वर दिएका छन् । 

तीन वर्षअघि सार्वजनिक गीतमा तेजशकै शब्द एवं संगीत तथा आशिष अविरलको एरेन्ज छ । 

यस गीतको भिडियोले युट्युबमा १ करोड ११ लाख बढी भ्युज पाएको छ । 

यस गीतको भिडियोमा कुलेन्द्र विश्वकर्मा, तेजश रेग्मी, रक्षा श्रेष्ठ लगायतको अभिनय छ ।

शिव बि.क.को कोरियोग्राफी एवं निर्देशनमा बनेको भिडियोलाई रामेश्वर कार्कीले छायाँकन एवं सुजन शाहीले सम्पादन गरेका हुन् । 

‘ईनाक्षी इन्टरटेन्मेन्ट’ युट्युब च्यानलमा भिडियो हेर्न सकिन्छ ।

अभाव: १ करोड ७ लाख भ्युज

विष्णु माझी र गणेश अधिकारीको स्वरमा ३ वर्ष ८ महिनाअघि सार्वजनिक गीत हो, अभाव । 

यो गीतको हालको भ्युज १ करोड ७ लाख बढी छ । गणेश अधिकारीको शब्द एवं संगीत रहेको गीतलाई बिनोद बाजुरालीले एरेन्ज गरेका हुन् । 

स्मृति तिमिल्सिना ‘गुरुआमा’को निर्देशनमा बनेको भिडियोमा सारिका केसी, आशिर प्रताप जंग र अविरल बोहोराको अभिनय छ । 

सुरेश श्रेष्ठको छायाँकन रहेको भिडियोलाई सुजन शाहीले सम्पादन गरेका हुन् ।

कस्लाई सोध्ने होला: १ करोड २ लाख भ्युज

‘कस्लाई सोध्ने होला’बोलको गीत १० वर्षअघि सार्वजनिक भएको हो । 

शिव हमालको शब्द, संगीत रहेको गीतमा विष्णु माझी र भागिरथ चलाउनेको स्वर छ । 

प्रेम विरहको यस गीतले सार्वजनिक भएको एक दशकमा युट्युबमा करोड भ्युज पार गरेको हो । 

कपिल लामाको निर्देशनमा तयार यस गीतको भिडियोमा रञ्जिता गुरुङ र बाबुराम बोहोराको अभिनय छ ।

सुदिप बरालको छायाँकन रहेको भिडियो म्युजिक नेपाल युट्युब च्यानलमा हेर्न सकिन्छ । 

विष्णुका करोड क्लबको नजिक पुगेका गीतहरू भने दर्जनौं छन् । 

राम्रो भ्युज पाउँदा पनि किन ट्रेन्डिङमा आउँदैनन् उनका गीत ? 

महंगो पारिश्रमिक लिने भएपछि पछिल्लो समय विष्णु माझीले बाहिरी गीतहरू त्यति गाएकी छैनन् ।

 श्रीमान (सुन्दरमणि अधिकारी)को सिर्जनामा उनका प्राय गीतहरू सार्वजनिक हुँदै आएका छन् । 

उनीहरूकै ‘सपना म्युजिक इन्डष्ट्रिज’मार्फत ती गीतहरू सार्वजनिक हुने गर्दछन् ।

उक्त च्यानलमार्फत सार्वजनिक माझीका गीतहरूले युट्युबमा राम्रो भ्युज पाउने गरेका छन् ।

गत वर्षको ‘चरी जेलैमा’ले उत्कृष्ट भ्युज पाएको थियो । 

त्यसपछाडि उनको दशैं तिहार गीत ‘दशैं तिहार आइसक्यो’ र त्यसपछिको लोकदोहोरी गीत ‘मुटु खाने माया’ले युट्युबमा राम्रो भ्युज पायो ।

यसवर्षको ‘चरी जेलैमा २’ ले पनि युट्युबमा राम्रो भ्युज पाएको छ । 

सार्वजनिक भएको पाँच दिनमा उक्त गीतको भिडियोले ३० लाख बढी भ्युज पाइसकेको छ ।

तर, अचम्मको कुरा उनको गीत युट्युब टेन्ड्रिङमा भने आउने गरेका छैनन् ।

यसअगाडि जस्तै ‘चरी जेलैमा २’ पनि ट्रेन्डिङमा देखिएको छैन ।  

हिजोआज १ लाख भ्युज नपाएको अन्य गीतहरू ट्रेन्डिङमा देखिएका हुन्छन् । तर, उनका गीतहरू किन ट्रेन्डिङमा आउँदैनन् ? धेरैको जिज्ञासा हुने गरेको छ । 

‘उहाँको युट्युब च्यानलबाट ट्रेन्डिङमा आउँदैन । पहिले एकपटक च्यानल बिग्रिएको थियो रे ! त्यसपछि उक्त च्यानलमा सार्वजनिक गीत ट्रेन्डिङमा आएका छैनन्’ विष्णुको पछिल्लो गीत ‘चरी जेलैमा २’को भिडियोसँग जोडिएका एक सदस्यले लोकान्तरसँग भने ।

उनले भनेजस्तै युट्युबमा समस्या देखिँदा अन्य कलाकारहरूका गीतहरू समेत ट्रेन्डिङमा नआउने गरेका छन् । 

केही समय लोकगायक पशुपति शर्माको युट्युबबाट सार्वजनिक गीतहरू समेत ट्रेन्डिङमा आउने गरेका थिएनन् । 

पछि उक्त समस्या समाधान भएको थियो । अहिले भने पशुपतिका गीतहरू ट्रेन्डिङमा देखिने गरेका छन् ।