रूपन्देहीको तिलोत्तमास्थित क्रिमसन अस्पतालमा उपचारका क्रममा बिरामीको मृत्यु भएपछि तनाब उत्पन्न भएको छ ।

उपचारमा संलग्न चिकित्सकको लापरवाहीले गर्दा बिरामीको मृत्यु भएको आरोप लगाउँदै बिरामीका आफन्तले अस्पतालमा नाराबाजी गरेका छन् । 

रुपन्देहीको सियारी गाउँपालिका– ७ की ३९ वर्षीया अमृता कहारको उपचारका क्रममा मृत्यु भएपछि बुधवार अस्पतालमा तनावको स्थिति उत्पन्न भएको हो ।

पत्थरीको शल्यक्रिया गराएकी अमृताको अकस्मात निधन भएपछि आफन्तले चिकित्सकको लापरवाही भएको आरोप लगाएका छन् । 

साउन २५ गते पत्थरीको अप्रेसन गराएर घर गएकी अमृता मंगलवार दिउँसो एक्कासि बेहोस भई ढलेपछि पुनः उपचारका लागि क्रिमसन अस्पतालमै ल्याइएको उनका आफन्तले बताएका छन् ।

जिल्ला प्रहरी कार्यालय, रुपन्देहीमा इन्स्पेक्टर बेद पौडेलले बिरामीको निधनपछि आफन्तहरू आवेशमा आएर तोडफोडमा उत्रिएको बताए ।

पौडेलले घटनाको अनुसन्धान गरी समस्या समाधानको पहल भइरहेको जानकारी दिए ।