रुसको जनसंख्या लगातार घटिरहेको छ । त्यसले गर्दा राष्ट्रपति भ्लादिमिर पुटिन चिन्तित छन् । 

जनसंख्या बढाउनका लागि पुटिनले महिलाहरूलाई १० सन्तान जन्माउन आग्रह गरेका छन् । त्यसो गर्ने महिलालाई २१ लाख रुपैयाँ पुरस्कार दिइनेछ । 

उनीहरूलाई मदर हिरोइन नामक पुरस्कार पनि दिइनेछ । दोस्रो विश्वयुद्धको समयमा सन् १९४४ मा यो पुरस्कार स्थापना गरिएको थियो । सन् १९९१ मा सोभियत संघ भंग भएपछि यो पुरस्कार दिन बन्द गरिएको थियो । 

सोमवार पुटिनले जारी गरेको आदेशमा महिलाको १०औं सन्तान जन्मेको एक वर्षमा २१ लाख रुपैयाँ खातामा जाने उल्लेख छ । कुनै सन्तानको मृत्यु भएछ भने पनि आमालाई सबै रकम दिइनेछ । 

रुसको जनसंख्या दशकौंदेखि लगातार घटिरहेको छ । मानिसहरूमा बच्चा पाउने कुनै उत्साह छैन । रुस युक्रेन युद्धका कारण कैयौं रुसी सैनिकको ज्यान गएको छ । त्यसअघि कोरोना महामारीले पनि धेरै रुसीहरूको ज्यान लिएको थियो । 

रुसको जनसंख्या अहिले साढे १४ करोड रहेको अनुमान छ । कम जन्मदर तथा बूढो हुँदै गएको जनसंख्याको समस्या रुसमा मात्र नभई कैयौं विकसित देशमा छ । 

जनसंख्या समस्या समाधानका लागि आप्रवासन एउटा राम्रो उपाय भए पनि त्यसले ल्याउने राजनीतिक तनावका कारण रुस तथा अन्य धेरै मुलुक त्यसमा इच्छुक छैनन् ।