हेटौंडा उपमहानगरपालिकाको निर्णयको विरोधमा अटोचालकहरू आन्दोलित बनेका छन् । २०७६ पुस ७ गतेभन्दा अगाडि दर्ता गरिएका अटोलाई मात्र नगर क्षेत्रमा सञ्चालन गर्न दिने नगरपालिकाको निर्णयको विरोधमा अटो चालकहरू आन्दोलित बनेका हुन् । उनीहरूले बिहीवार उपमहानगरपालिकाको कार्यालय घेराउ गरेका छन् ।  

हेटौंडा उपमहानगरपालिकाले अटो मयुरी व्यवसायी संघसँगको सहमतिअनुसार २०७६ पुस ७ गतेभन्दा अगाडि दर्ता र रुट पर्मिट पाएका अटोमा स्टीकर टाँस्दै आएको छ । यसरी स्टीकर टाँसिएका अटोमात्रै उपमहानगर क्षेत्रमा चल्न निर्णय गरेको थियो ।

उपमहानगरपालिकाले २०७६ पुस ७ गतेभन्दा पछाडिका अटो÷मयुरीलाई थेग्न नसक्ने भन्दै प्रतिबन्ध लगाएको छ । हेटौंडा ५ का अटो व्यवसायी रमेश राईले उपमहानगरले २०७६ पुस ७ गतेपछि पनि अटो तथा मयुरी बेच्न स्वीकृति दिएको बताए । 

अटो चालक व्यवसायीहरूले पर्मिटको माग गर्दै बुधवार पनि उपमहानगरपालिकाको कार्यालय परिसरभित्र विरोध प्रर्दशन गरेका थिए ।