पूर्व प्रधानमन्त्री एवं नेकपा एमालेका अध्यक्ष केपी शर्मा ओलीले सत्ता गठबन्धनसँग आगामी निर्वाचनमा प्रतिस्पर्धा गर्न एमाले तयार रहेको बताएका छन् ।

बिहीवारै गृहजिल्ला झापा आइपुगेका उनले कचनकबलको बनियानीमा आयोजित पार्टी कार्यक्रमलाई सम्बोधन गर्दै गठबन्धनको सामना गर्न एमाले तयार रहेको बताए ।

उनले एमाले कार्यकर्तालाई उच्च मनोबल र जीतको मानसिकता बोकेर चुनावी अभियानमा लाग्न निर्देशन दिए ।

अध्यक्ष ओली बिहीवार दिउँसो गृहजिल्ला झापा आएका हुन् । उनी ३ दिन झापाका पार्टी कार्यक्रममा व्यस्त रहने बताइएको छ । ३ हप्ताअघि पनि उनी ४ दिन झापाको पार्टी कार्यक्रममा सहभागी भएर राजधानी फर्किएका थिए ।

उनको संसदीय क्षेत्रका प्रतिनिधि एवं एमाले प्रदेश कमिटी सदस्य होमबहादुर थापाका अनुसार कचनकबल, बिर्तामोड, गौरादह, दमक र इलामको चुलाचुलीमा आयोजना हुने कार्यक्रममा ओलीले सम्बोधन गर्ने कार्यक्रम छ ।