गत शुक्रवार सार्वजनिक भएको फिल्म लाइगरले सप्ताहान्तमा जम्मा ३६ करोड भारु कमाएको छ । 

अहिलेसम्मको कलेक्सन हेर्दा फिल्मले १०० करोड भारु पनि कमाउन धौधौ पर्ने देखिएको छ । दक्षिण भारतमा समेत फिल्मका ९० प्रतिशत शो रद्द गरिएका छन् । 

आमिर खानको लाल सिंह चड््ढाले पनि सार्वजनिक भएको दुई सातामा जम्मा ५७ करोड भारु कमाएको छ । १७० करोड भारुमा बनाइएको फिल्मले भारतबाट ५७ करोड मात्र कमाएको हो । फिल्मले अन्तर्राष्ट्रिय बजारको कमाइबाट लगानी उठाएको बताइएको छ तर फिल्मलाई फ्लप नै मानिएको छ । 

विगत केही समययता आएका बलिउड फिल्महरू सबै एकपछि अर्को फ्लप भएका छन् । द कश्मीर फाइल्स र भूलभुलैया २ ले मात्र राम्रो कमाइ गर्न सकेका छन् । 

२०० करोड भारुमा बनाइएको सम्राट पृथ्वीराजले जम्मा ९० करोड भारु कमाएको छ । अनि १५० करोड भारुमा बनेको शमशेराले जम्मा ४० करोड भारु कमायो । 

फिल्म फ्लप हुँदा निर्माताहरूले करोडौंको ऋण तिर्न गाह्रो पर्छ र कतिपय त बर्बाद नै हुन्छन् । 

कंगना रनावतको धाकड फिल्म यति ठूलो फ्लप साबित भयो कि यसलाई दुई दिनमै देशका ३०० वटा सिनेमाहलबाट हटाइयो । २१ सय हलमा लागेको फिल्म दोस्रो हप्ता आइपुग्दा जम्मा २५ स्क्रीनमा सीमित भयो । दुई दिनपछि त्यसको शो पनि क्यान्सिल भयो । ८० करोड भारुमा बनेको फिल्मले जम्मा ३.५ करोड भारु कमायो । 

सन् २०१७ मा रिलीज भएको अब्बास मस्तानको फिल्म मशिन भयंकर ठूलो फ्लप थियो । अब्बासले आफ्ना छोरा मुस्तफालाई फिल्ममा लोन्च गरेका थिए । 

आरम्भमै फिल्मको प्रदर्शन यति खराब रह्यो कि एउटा शो हेर्न त जम्मा एकजना पुगेका थिए । त्यसपछि फिल्म हटाइयो । ३० करोड भारुमा बनेको फिल्मले जम्मा २ करोड भारु कमायो । 

६ वर्ष लगाएर बनाइएको फिल्म मेरा नाम जोकर राज कपूरको ड्रीम प्रोजेक्ट थियो । फिल्म बनाउनका लागि राज कपूरले पत्नी कृष्णाका सबै गहना गिरवी राखेर ऋण लिएका थिए ।

चार घन्टा लामो फिल्म बेइज्जतीपूर्ण फ्लप भएपछि राज कपूर ऋणमा चुर्लुम्म डुबे । नोक्सानको भरपाईका लागि उनले छोरो ऋषि कपूरलाई नायक बनाएर बबी फिल्म बनाएका थिए ।