बाराका एक युवकले भाउजुसँगको अवैध सम्बन्ध थाहा पाएपछि आफ्नै श्रीमतीको हत्या गरेका छन् । बारा महागढीमाई नगरपालिका–३ गन्जभवानीपुरका २७ वर्षीय सैमोदिन अन्सारीले २५ वर्षीया श्रीमती सहनाज खातुनको हत्या गरेका हुन् । सैमादिनले भाउजुसँग अवैध यौनसम्बन्ध स्थापित गर्दै आएको श्रीमतीले थाहा पाएपछि उनको हत्या गरेको प्रहरीले जनाएको छ । 

जिल्ला प्रहरी कार्यालयका प्रमुख एसपी होविन्द्र बोगटीका अनुसार सैमोदिन र सहनाजको ६ महिना अगाडि मात्र विवाह भएको थियो । उनी वैदेशिक रोजगारीका क्रममा विगत ६ वर्षदेखि मलेसिया बस्दै आएका थिए । उनले ६ महिना अगाडि मात्र नेपाल आएर सहनाजसँग विवाह गरेका थिए । उनका दाजु पनि वैदेशिक रोजगारीका क्रममा दुबईमा छन् । दाजु नभएको मौकामा उनले भाउजु अप्सना खातुनसँग यौनसम्बन्ध स्थापित गर्दै आएको प्रहरीले बताएको छ । 

भदौ १६ गते राति सहनाजले ‘तपाईंको भाउजुसँग सम्बन्ध छ किन यस्तो गर्नु भएको’ भनेर सोध्दा सैमादिनले उनको घाँटीमा सलले बेरेर हत्या गरेको बयान  प्रहरीलाई दिएका छन् ।

एसपी बोगटीका अनुसार हत्यापछि सैमोदिनले सहनाजका माइती पक्षलाई ‘तपाईंकी छोरीको मृत्यु भयो’ भन्दै फोन गरेका थिए । उनीहरूले आफन्त बोलाएर सद्गद् गर्ने तयारी गरिसकेका थिए । तर, माइती पक्षले शंका लागेपछि प्रहरीमा उजुरी दिएका थिए । त्यसपछि हत्याबारे थाहा भएको हो । 

प्रहरीले घटनास्थलमा गएर अनुसन्धान गर्दा आँखाबाट रगत बगेको देखेपछि मृत शवलाई पोष्ट मार्टमको लागि त्रिवि शिक्षण अस्पताल महाराजगञ्ज पठाएको थियो । 

प्रहरीका अनुसार शुरूमा सैमोदिनलाई शंका लागेर सोधपुछ गर्दा सहनाज आफूसँगै सुतेको तर बिहान उठ्दा मृत फेला परेको बताएका थिए । तर, प्रहरीले अप्सनाका ४ वर्षीय छोरालाई सोधपुछ गर्दा राति उनका काका र आमासँगै सुतेको र बीचमा काकीको कोठामा गएको बताएपछि हत्या गरेको पोल खुलेको थियो ।

‘उसले पहिला मृत फेला परेको बताएको थियो । शवको अवस्था हेर्दा हत्याजस्तो देखिँदैनथ्यो । हामीले बच्चालाई सोध्दा आमासँग सँगै सुतेको कुरा थाहा पाएपछि उसले सबै पोल खोल्यो,’ एसपी बोगटीले लोकान्तरसँग भने ।

सैमोदिनले प्रहरीलाई दिएको बयानअनुसार उनले भाउजु र आफ्नो सम्बन्धको बारेमा कुरा गरेपछि भित्तामा टाउको ठोक्काएर बेहोस बनाई घाँटीमा सलले बेरेर हत्या गरेका थिए । उनले त्यो राति हत्या गरेपछि पुनः भाउजुसँग आएर सुतेको र यौनसम्पर्क राखेको समेत प्रहरीलाई बताएका छन् । 

‘प्रारम्भिक बयानमा सैमादिनले विगतमा पनि भाउजुसँग सम्पर्क स्थापित गर्ने गरेको बताएका छन्,’ एसपी बोगटीले भने । प्रहरीले शुक्रवार उनीहरूलाई सार्वजनिक गरेको छ । ७ दिनको म्याद थप गरेर अनुसन्धान शुरू गरेको एसपी बोगटीले बताए ।