लामो समयदेखि रोकिएको जग्गाको कित्ताकाट खुलाउन संसदमा आवाज उठेको छ ।

बुधवार बसेको प्रतिनिधिसभा बैठकको शून्य समयमा कांग्रेसका पदमनारायण चौधरीले जमिनको वर्गीकरण नहुञ्जेलसम्म कित्ताकाट फुकुवा गर्न माग गरेका हुन् ।

‘सरकारले कृषि क्षेत्र र गैर कृषि क्षेत्रलाई छुट्याउन स्थानीय निकायलाई सम्पूर्ण जिम्मेवारी दिएको छ । जुन काम पूर्णरूपमा सम्पन्न गर्न समय लाग्नसक्छ,’ चौधरीले भने, ‘कित्ताकाट हुन नसक्दा जनतालाई पीरमर्का परेकाले कृषि क्षेत्र र गैर कृषि क्षेत्र छुट्याउनुअघि केही समयलाई कित्ताकाट फुकाउन सरकारको ध्यानाकर्षण गराउँछु ।’

सरकारले मंसिरसम्ममा कृषि र गैर कृषि क्षेत्रको वर्गीकरण गर्न स्थानीय तहलाई आग्रह गरिसकेको छ ।