फ्राइडे रिलिज अन्तर्गत आज (शुक्रवार)देखि दुई नयाँ नेपाली फिल्म प्रदर्शनमा आएका छन् । 

सुजित विडारी लिखित एवं निर्देशित फिल्म ‘ऐना झ्यालको पुतली’ र प्रदीप शाही निर्देशित फिल्म ‘गोर्खाः विनिथ द ब्रेभरी’ प्रदर्शनमा आएका हुन् । 

यी दुबै फरक–फरक जनरामा निर्माण भएका फिल्म हुन् ।

‘ऐना झ्यालको पुतली’ले प्रदर्शनअघि गरिएको विशेष प्रदर्शनी र प्रिमियरमा निकै राम्रो प्रतिक्रिया पाएको छ । 

फिल्मकर्मीले यसलाई आफ्नो बाल्यकालमा फर्काउने फिल्म भनेका छन् । 

फिल्ममा कञ्चन चिमरिया, सिरु बिष्ट, दिनेश खत्री, अशोक शिवाकोटी, क्षितिज लिम्बू, उमेश श्रेष्ठ, मल्लिका श्रेष्ठ, विशा चाम्लिङ राई, राज थापा, पदमप्रसाद पौडेललगायतका कलाकारहरूको अभिनय रहेको छ ।

फिल्मलाई सामाजिक जनरामा राखिएको छ । 

यता, ‘गोर्खाः विनिथ द ब्रेभरी’ भने गोर्खाहरूका लागि पहिलो पटक भिक्टोरिया क्रस प्राप्त गर्ने कुलवीर थापाको वास्तविक कथामा निर्माण भएको हो । 

केही दिनअघि राजधानीमा गरिएको प्रिमियरमा यस फिल्मले पनि राम्रो प्रतिक्रिया पाएको छ । 

फिल्ममा समिर गुरुङ, गौमाया गुरुङ, स्टुअर्ट वाल्कर, एगिस्टिनो ओबरहोफर, ओली बस्सी, रोबिन फ्रिबर्ग, राजान गुरुङ, सूर्य गुरुङ, स्योन शाहीलगायतको अभिनय छ । फिल्मलाई एक्सन र ड्रामा जनरामा राखिएको छ । 

यता शुक्रबारदेखि बलिउड फिल्म ‘ब्रमास्त्र’ पनि प्रदर्शनमा आएको छ । 

अयान मुखर्जी निर्देशित ‘ब्रह्मास्त्र’मा रणवीर कपुर, आलिया भट्ट, अमिताभ बच्चन लगायतको अभिनय छ । 

भदौ १० गतेदेखि प्रदर्शनमा आएको प्रदीप खड्का स्टारर फिल्म ‘प्रकाश’ पनि प्रदर्शनरत छ । 

त्यस्तै, गत शुक्रवारदेखि प्रदर्शनमा आएका दुई नेपाली फिल्म ‘झिंगेदाउ’ र ‘सम्हालिन्छ कहिले मन’ दोस्रो सातामा प्रवेश गरेका छन् ।