नेकपा (एमाले)का नेता एवं पूर्वमन्त्री महेश बस्नेतले मंसिर ४ गते हुने प्रतिनिधिसभा र प्रदेशसभा निर्वाचनपछि आफ्नो पार्टी सरकारमा आउने दाबी गरेका छन् । शुक्रवार भक्तपुरमा आयोजित पार्टीनिकट राष्ट्रिय युवा संघ, नेपाल बागमती प्रदेशस्तरीय निर्वाचन परिचालन भेलामा बोल्दै उनले यस्तो दाबी गरेका हुन् । 

बस्नेतले एमाले फुटाउने कर्ममा लागेका फटाहाहरू र अपराधकर्ममा लिप्त रहेका तत्कालीन अर्थमन्त्री जनार्दन शर्मालाई सफाइ दिई फेरि अर्थमन्त्री बनाउने अभियानमा संलग्नहरूलाई आफ्नो पार्टीको सरकार बनेपछि तह लगाउने चेतावनी समेत दिए । उनले आगामी निर्वाचनमा आफ्नो पार्टीलाई विजयी गराउन सकेसम्म सर्वसम्मत उम्मेदवार चयन गर्ने र टोलटोलमा पार्टीको संगठन परिचालन गर्ने कामलाई तीव्रता दिने योजना बनाइएको बताए । 

‘मंसिर ४ गते पछाडि नेकपा (एमाले) फेरि सरकारमा आउँदैछ । त्यतिखेर अपराधी र फटाहाहरूलाई एमालेले तह लगाउनेछ । एमालेले आगामी निर्वाचन जित्नका लागि टोलटोलमा संगठन निर्माणको काम गर्ने र सकेसम्म सर्वसम्मत उम्मेदवार बनाउने कामलाई तीव्रता दिएको छ । र, त्यस काममा युवा संघ, नेपालले महत्वपूर्ण भूमिका निर्वाह गर्नुपर्छ’, उनले भने, ‘एमाले फुटाउनका लागि अर्थ मन्त्रालयका सीसीटीभी फुटेज लुकाउन लाग्छ । गृह मन्त्रालय पनि लुकाउन लाग्छ । छानबिन आयोग सफाइ आयोगमा परिणत हुन्छ । अनि सफाई दिएर जनार्दन शर्मालाई फेरि अर्थमन्त्री बनाइन्छ ।’ 

नेता बस्नेतले मुलुकमा विकास निर्माण हुन नदिन, भ्रष्टाचारलाई प्रश्रय दिन, राष्ट्रियतालाई समाप्त पार्न सत्तारुढ गठबन्धन एमालेविरुद्ध लागि परेको आरोप लगाए । ‘किन एमालेविरुद्ध गठबन्धन ? एमालेले विकास गर्छ । यो धर्तीमा विकास गर्नु हुन्न । त्यही भएर गठबन्धन । एमाले राष्ट्रियताको पक्षमा छ । यो धर्तीमा राष्ट्रियता समाप्त पार्नुपर्छ । त्यही भएर गठबन्धन । एमाले जनताको जीविकाको पक्षमा छ । गठबन्धन भ्रष्टाचारलाई प्रश्रय दिन्छ । त्यही भएर गठबन्धन ?’, उनले प्रश्न गरे ।