गुल्मीको रेसुङ्गा नगरपालिका वडा नम्बर ६ निनीचौरका ३० वर्षीय यमबहादुर कुँवर आइतवार बिहान झिसमिसेमै कुखुरा फार्ममा जाँदै थिए । 

परिवारका सदस्य र छिमेकीहरू उठेकै थिएनन् ।

नजिकै पुगेपछि उनले फार्ममा एउटा चितुवा देखे । चितुवाले कुखुरा समेत मारेको देखेपछि उनी आत्तिए । चिच्याउँदै भाइलाई बोलाए ।

भाइ उठ्नै नभ्याएकोले आउन ढिला भयो । छिमेकीहरूलाई पनि बोलाए, कसैले सुनेनन् ।

यमबहादुरलाई देखेपछि चितुवा यताउता गरेर फन्को लगाउन थाल्यो ।

यमबहादुर बारीको डिलमा उभिएका थिए । यताउता फन्को मारिरहेको चितुवाले एक्कासि आक्रमण गर्‍यो । यमबहादुरलाई तल पारेर चितुवाले हातमा टेक्यो ।

‘म उँधो (तल) परें । मरो हात उसको मुखमा थियो । त्यसपछि मैले उसलाई तल पारेँ र एउटा हात फुत्काएर मुखमा एक मुड्कीले हान्न थालें,’ कुँवरले भने ।

मुड्कीले हानेकोहान्यै गरेपछि चितुवाले अर्को हात पनि छाडिदियो । त्यसपछि उनी चितुवामाथि चढेर मुख र आँखामा माटो हालिदिए ।

‘माटो हालेपछि उसले आँखा देखेन । कराउन थाल्यो । पञ्जाले मेरो मुख र अन्य ठाउँमा लछार्‍यो,’ यमबहादुरले थपे ।

त्यसपछि बल्ल उनका भाइ आइपुगे । गाउँलेहरू पनि साथ दिन आइपुगे । यमबहादुरसँगको लडाईंमा चितुवा मर्‍यो । उनको ज्यान बाँच्यो ।

झण्डै १० मिनेट जति चितुवासँग लडाईं परेको उनले बताए ।

लडाईं सकिँदा उनलाई रिंगटा लाग्न थालेको थियो । घरमा आएर पानी खाए । अनि परिवारका सदस्य र छिमेकीको सहयोगमा स्वास्थ्य संस्थामा लगियो ।

यमबहादुरको अनुहार, हात र शरीरका विभिन्न भागमा चोट लागेको छ । उनी अहिले उपचाररत छन् । चितुवाले फार्ममा रहेका सानाठूला गरी ६१ वटा कुखुरा मारेको छ ।