नेपाल वायुसेवा सञ्चालक संघले नेपाल आयल निगमले उपत्यकाबाहिरका विमानस्थलहरुमा पर्याप्त मात्रामा हवाइ इन्धन उपलब्ध नगराएको गुनासो गरेको छ । संघले नेपाल नागरिक उड्डयन प्राधिकरणलाई सोमबार एक पत्र लेख्दै  विमानस्थलहरुमा हवाई इन्धनको सहज र सरल उपलब्धताका लागि सम्बन्धित निकायमा यथाशीघ्र आवश्यक पहल गरी दिन अनुरोध गरिएको छ । 

संघका अध्यक्ष रामेश्वर थापाको हस्ताक्षरित पत्रमा निगमले काठमाडौं बाहेक बाहिरी विमानस्थलहरुमा पर्याप्त मात्रामा हवाई इन्धन उपलब्ध नगराएका कारण सदस्य वायुसेवा कम्पनीहरुका उडानहरुमा असर परिरहेको उल्लेख गरिएको छ । 
हवाई इन्धन सहज उपलब्ध नहुँदा उडान नै बन्द गर्नु पर्ने अवस्था श्रृजना हुने र आम सर्वसाधारणलाई भरपर्दो, सुरक्षित तथा सुलभ हवाई सेवा उपलब्ध गराउन कठिन हुन जाने संघको भनाइ छ । 

‘यसबाट हवाई सेवामार्फत आवतजावत गर्न चाहने महानुभावहरू हवाई सेवाबाट बञ्चित हुनुपर्ने अवस्था प्रति विशेष ध्यानाकर्षणका गराउँदै विमानस्थलहरुमा हवाई इन्धनको सहज र सरल उपलब्धताका लागि सम्बन्धित निकायमा यथाशीघ्र आवश्यक पहल गरी दिन हुन हार्दिक अनुरोध गर्दछु’, महानिर्देशकलाई सम्बोधन गरिएको पत्रमा भनिएको छ ।