सञ्चार तथा सूचना प्रविधिमन्त्री ज्ञानेन्द्रबहादुर कार्कीले निजी क्षेत्रसँगको सहकार्य बिना मुलुकलाई समृद्ध बनाउन नसकिने धारणा राखेका छन् । मुलुकलाई समृद्ध बनाउने राजनीतिक संकल्प पूरा गर्न निजी क्षेत्रसँग सहकार्य गर्नुपर्ने आफ्नो धारणा रहेको उनले प्रष्ट पारे । 

बिहीवार ललितपुरमा आयोजित ‘मोबाइल डिभाइस म्यानेजमेन्ट सिष्टम’को आरम्भ गर्दै मन्त्री कार्कीले मुलुकको विकासका लागि सबै सम्भावनाहरूलाई अवसरको रूपमा परिणत गर्नुपर्ने बताए । उनले नेपालको अर्थतन्त्र श्रीलंकाको जस्तो नहुने दाबी पनि गरे ।

‘सरकार निजी क्षेत्रलाई प्रोत्साहित गर्न चाहन्छ । निजी क्षेत्रसँग हातेमालो गरेर अगाडि नबढी मुलुकलाई समृद्ध गराउने जुन हामी सबैको अभिलाषा छ । त्यो अभिलाषा पूरा हुन सक्दैन भन्ने कुरामा म पूर्णरूपले जानकार छु’, उनले भने, ‘एउटा भ्रम पनि सिर्जना गरियो, नेपालको अर्थतन्त्रको हालत श्रीलंकाको जस्तो हुँदैछ भनेर । हामी सचेत हुन जरुरी थियो । र, मैले धेरै सार्वजनिक फोरमहरूमा बोलेको छु, कि हाम्रो अवस्था श्रीलंकाको जस्तो हुँदैन । हुन दिनु पनि हुँदैन । हामीसँग धेरै सम्भावनाहरू छन् । ती सम्भावनाहरूलाई अवसरको रुपमा परिणत गरेर अब हामीसँग अगाडि बढ्नुको विकल्प छैन ।’

मन्त्री कार्कीले मंसिर ४ गते हुने प्रदेश सभा र प्रतिनिधि सभा निर्वाचनलाई १० वर्षभित्रमा नेपाललाई दक्षिण एसियामा सम्पन्न मुलुकको रूपमा चिनाउने अभियानको रूपमा अगाडि बढाउने प्रतिबद्धता व्यक्त गरेका छन् । उनले आगामी निर्वाचन जनतालाई मत माग्ने र मत दिने मेसिनको रूपमा मात्रै नलिई आफूहरूले १० वर्ष भित्रमा कमसेकम नेपाललाई दक्षिण एसियाको सम्पन्न मुलुकको रूपमा चिनाउने अभियानको रूपमा अघि बढाउने बताए । 

‘अहिले हामी निर्वाचनको संघारमा छौँ । र, हामीले जनतालाई केवल मत माग्ने र मत दिने एउटा मेसिनको रूपमा होइन् । अब समुन्नत नेपाल, समृद्ध नेपाली र १० वर्ष भित्रमा कमसेकम दक्षिण एसियामा सम्पन्न मुलुकको रूपमा नेपाललाई चिनाउने अभियानको रूपमा यो निर्वाचनमा हामी जनताको सामू जानु पर्दछ । र, जनताबाट अनुमोदित भएर त्यस दिशामा देशलाई हामीले निर्देशित गर्नुपर्ने अहिलेको अवस्था छ’, उनले भने ।