नेकपा एमालेका अध्यक्ष केपी शर्मा ओलीले माधव नेपालको समयमा आफूले सधैं अपमान भोग्नुपरे पनि पार्टी नछाडेको बताएका छन् । बिहीवार एमाले पार्टी कार्यालय च्यासलमा आयोजित पार्टी प्रवेश कार्यक्रमलाई सम्बोधन गर्दै ओलीले माधव नेपाल एमालेको नेतृत्वमा रहँदा पटक–पटक अपमान भोग्नु परेको स्मरण गरेका हुन् । 

एमालेले माओवादी केन्द्रको केन्द्रीय सदस्य एवं चितवनका सह–इन्चार्ज यमबहादुर परियार (इन्द्रजीत)लाई पार्टी प्रवेश गराउन कार्यक्रम आयोजना गरेको थियो । 

उनी एमाले र माओवादी केन्द्र एकता भएर नेकपा बन्दा चितवन जिल्ला अध्यक्ष भएका थिए । 

परियारसहित माओवादी जनमुक्ति सेनाका तत्कालीन ब्रिगेड कमाण्डर अन्जन तिमल्सिनालगायतलाई अध्यक्ष केपी शर्मा ओली, उपाध्यक्ष रामबहादुर थापा बादल, सुरेन्द्र पाण्डेलगायतका नेताहरूले स्वागत गरेका छन् ।

कार्यक्रममा राजेन्द्र प्रधानले पनि एमाले प्रवेश गरेका छन् । २०५० सालमा विदेश विभाग सदस्यबाट अपमानजानक रूपमा हटाएको भन्दै उनले एमाले छाडेका थिए ।

ओलीले त्यसबेलाको अवस्था स्मरण गर्दै भने, ‘म संसदीय दलको उपनेता थिएँ । चलनअनुसार नेमप्लेट टाँसिएको थियो । अर्कोपटक आएर दलको कार्यालयमा कुर्सीमा बस्न खोज्दा कर्मचारीले आएर बाहिर नेमप्लेट हेर्नुभएन ? अर्कै आइसक्नुभएको छ भने । मैले यसो बाहिर हेरेको उपनेताको नेमप्लेटमा अर्कैको नाम आइसकेछ । यस्ता त दैनिक हुन्थे, अहिले एउटा विभाग प्रमुख हुन्थेँ एकछिनमै हटिसकेको हुन्थेँ ।’

त्यसबेला आफूले एउटा विभागको प्रमुख नपाउँदा कतिपय नेताले ८ देखि ११ वटा विभागको प्रमुखको जिम्मेवारी लिने गरेको बताए । 

त्यसबेला एमालेमा स्वेच्छाचारी र निरंकुशता हाबी भएको ओलीले स्मरण गरेका थिए ।