कायममुकायम प्रधानन्यायाधीश दीपक कार्कीले चोलेन्द्र शमशेर जबरा निलम्बन फुकुवाको पत्र लिएर आएमा स्वागतका लागि आफू नै सर्वोच्चको गेटमा जाने बताएका छन् ।

सर्वोच्च प्रशासन र सुरक्षाकर्मीलाई उनले निलम्बन फुकुवाको पत्र लिएर आएमात्र अदालत छिर्न दिन निर्देशन दिएका स्रोतले लोकान्तरलाई बतायो । 

‘म त कामु मात्र हो, उहाँ(चोलेन्द्र)ले निलम्बन फुकुवाको पत्र लिएर आएमा म नै स्वागत गर्न गेटमा जान्छु’ कार्कीको भनाइ उद्धृत गर्दै स्रोतले भन्यो । 

प्रतिनिधि सभाको कार्यकाल सकिएलगत्तै चोलेन्द्रले आइतवार सर्वोच्च फर्किने तयारी गरेका थिए । 

चोलेन्द्रलाई रोक्न भन्दै सर्वोच्च बार एसोसिएसनका अध्यक्ष पूर्णमान शाक्यको नेतृत्वमा वकिलहरूले सर्वोच्च अदालत परिसरमा धर्ना समेत दिए । 

सर्वोच्च प्रशासनले निलम्बन फुकुवाको पत्र नआई भित्र छिर्न नदिन सुरक्षाकर्मीलाई निर्देशन दिएपछि सर्वोच्च परिसरमा सुरक्षा व्यवस्था कडा बनाइएको छ । 

सत्तारुढ दलले महाभियोग प्रस्ताव दर्ता गरेपछि फागुन १ देखि चोलेन्द्र निलम्बित अवस्थामा छन् । 

प्रतिनिधि सभाको महाभियोग सिफारिश समितिले चोलेन्द्रलाई महाभियोग लगाउनुपर्ने सुझावसहितको प्रतिवेदन हिजो सभामुखलाई बुझाएको थियो । 

प्रतिवेदनमा चोलेन्द्रबारे थप छानबिन गर्न अर्को प्रतिनिधिसभामा पठाउन प्रस्ताव गरिएको छ ।