आगामी ४ मंसिरमा हुन लागेको प्रतिनिधि सभा र प्रदेश सभाको निर्वाचनका लागि भन्दै राजनीतिक दलहरूले चुनावी गीत निर्माण गर्न थालेका छन् । नेपाली कांग्रेसले ‘मंसिर चार’ बोलको चुनावी गीत तयार पारेर सार्वजनिक समेत गरिसकेको छ । 

नेपाली कांग्रेसनिकट नेपाल सांस्कृतिक संघले गीत निर्माण गरेको हो । गीतमा राधिका हमाल, शशिविक्रम थापा, स्मृति शाही र गोविन्द मधुर आचार्यले स्वर दिएका छन् । लोकराज अधिकारीको शब्द रहेको गीतमा गोविन्द मधुर आचार्यले संगीत दिएका छन् । 

सांस्कृतिक संघका सभापति तीर्थ थापाको निर्देशनमा तयार भिडियोमा विक्रान्त बस्नेत, शिवहरी बैरागी, राधिका हमाल, स्वस्तिका लामिछाने, विष्णु रोक्का, सिरजन गजमेर, सुनिल पुरीलगायत प्रस्तुत भएका छन् । 

पार्टीका नेता तथा कार्यकर्तालाई जनतासमक्ष जान सजिलो होस् भनेर गीत निर्माण गरिएको सांस्कृतिक संघले जनाएको छ । भिडियोमा जीवन पराजुलीको छायांकन तथा उत्तर मगरको सम्पादन छ । अन्य दलहरुले पनि चुनावी गीत सार्वजनिक गर्ने तयारी गरेका छन् ।