सत्तारूढ गठबन्धनले निलम्बित प्रधानन्यायाधीश चोलेन्द्रशमशेर जबरालाई महाभियोग प्रस्तावमा बिलम्ब गरेर सफाइ दिएको नेकपा एमालेका अध्यक्ष केपी शर्मा ओलीले बताएका छन् । 

आइतवार ओली निवास बालकोटमा सञ्चाकर्मीहरूसँग कुराकानी गर्दै उनले गठबन्धनले प्रक्रिया अघि नबढाएर जबरालाई सफाइ दिएको बताएका हुन् । उनले भने, ‘संसदको कार्यकाल सकियो । महाभियोगको प्रस्ताव पारित भएन । दर्ता भयो र पारित भएन भने कुरा सिद्धियो ।’

रूसको संसद्मा बोरिस यल्सिनले गोलाबारी गरेको स्मरण गर्दै नेपाल सत्तारूढ गठबन्धनले सर्वोच्च अदालतमा गोलाबारी गरेको आरोप लगाए । ‘बोरिस यल्सिनले रुसको संसद्मा गोलाबारी गरेका थिए, गठबन्धनले अदालतमा गोलाबारी गर्‍यो । यस्ता बोरिस यल्सिनलाई के भन्ने ?’, ओलीले भने । 

महाभियोग प्रस्ताव नयाँ निर्वाचित संसद्ले निर्क्योल गर्न सक्छ कि सक्दैन भन्ने प्रश्नमा ओलीले भने, ‘यो यो जिन्दगीभर चलाउने विषय होइन । हरेक विषयको कार्यकाल हुन्छ । अवधि हुन्छ । सत्तामा पुगेर सेना प्रहरी हातमा छ भनेर जे गरे पनि हुन्छ । लोकतन्त्रमा यस्तो तमासा हुन्छ ?’

प्रधानन्यायाधीशमाथिको महाभियोग प्रस्तावलाई सत्तारूढ गठबन्धनले गणितीय खेल र षड्यन्त्र बनाएको र यो दुःखको कुरा भएको ओलीले बताए । 

‘अहिलेको सरकारले प्रधानन्यायाधीशलाई त घेर्छ भने संसदका कर्मचारीलाई के गर्छ ?’, उनले भने । संसद सचिवालयले संसदको अवधिभरिमा महाभियोगको विषय टुंगो लगाउन सकेन भनेर सर्वोच्च अदालतलाई पत्र लेख्नुपर्ने पनि ओलीले बताए ।

‘महाभियोगको प्रस्ताव ७ महिनासम्म अनिर्णित गर्ने काम सत्ता पक्षले ग¥यो । राज्यका सबै निकाय शक्ति पृथकीकरणको सिद्धान्तअनुसार चल्नुपर्छ’, उनले भने ।