अभिनेता प्रदीप खड्काले सोमवार बाराको सिमरामा दर्शकसँग बसेर प्रदर्शनरत आफ्नो फिल्म ‘प्रेमगीत ३’ हेरेका छन् ।

‘प्रेमगीत ३’ प्रदर्शनसँगै सञ्चालनमा आएको सिमरास्थित ‘केएसआर मुभिज’मा अभिनेता खड्काले दर्शकसँग बसेर फिल्म हेरेका हुन् ।

‘प्रेमगीत ३’ प्रदर्शन गर्नुअघि केएसआर हलको उद्घाटन गरिएको थियो । झण्डै १८ करोडको लागतमा निर्माण भएको फिल्म हलको अभिनेता खड्कासहित ‘प्रेमगीत ३’को कलाकार टोली, पूर्व श्रममन्त्री किसान श्रेष्ठ, निवर्तमान प्रदेशसभा सदस्य शोभा लामा, बाराका प्रमुख जिल्ला अधिकारी कृष्णबहादुर कटुवाल, हास्य कलाकार किरण केसी, सन्दीप क्षेत्री लगायतले एकसाथ उद्घाटन गरेका थिए ।

उद्घाटन कार्यक्रममा अभिनेता खड्काले राजधानीबाहिर सुविधासम्पन्न फिल्म हल सञ्चालनमा आएकोमा खुशी व्यक्त गरे । फिल्म ‘प्रेमगीत ३’ले नेपाललाई विश्वभर चिनाउन सफल भएको अभिनेता खड्काले बताए ।

हलको उद्घाटनपछि अभिनेता खड्काले दर्शकसँग बसेर फिल्म हेरेका थिए । उनीसँगै अभिनेत्री क्रिष्टिना गुरुङ, निर्माता एवं निर्देशक सन्तोष सेनलगायत सहभागी थिए ।

सिमराका व्यवसायी कासिम मियाँ, रोसित उन्निथान, राजन उप्रेती र सुदीप लामाको लगानीमा सञ्चालनमा आएको केएसआर हल सिमराकै पहिलो हो । यसअघि यस क्षेत्रबाट फिल्म हेर्न दर्शकलाई वीरगञ्ज र हेटौंडासम्म पुग्नुपर्ने बाध्यता रहेको थियो । 

केही समयअघि सिमरामा करोडौंको लगानीमा बिजनेश सेन्टर शुरू गरेका व्यवसायीले २ वटा स्क्रिन सहितको सुविधासम्पन्न फिल्म हल सञ्चालनमा ल्याएका हुन् ।

बाराका प्रमुख जिल्ला अधिकारी कटुवालले व्यवसायसँगै सिमरालाई सुविधा सम्पन्न शहरको रूपमा चिनाउन फिल्म हलले मद्दत पुग्ने बताए । कार्यक्रममा पूर्व फिल्मकर्मी युवराज लामा, हास्य कलाकार किरण केसी र सन्दीप क्षेत्रीले चुनौतीबीच सिमराका व्यवसायीले फिल्म क्षेत्रका लागि गरेको लगानीले सफलता प्राप्त गर्नेमा आशावादी रहेको बताए ।

केएसआर फिल्म हलमा नेपाली र हिन्दी भाषामा डबिङ गरिएको फिल्म ‘प्रेम गीत ३’ एकसाथ प्रदर्शन गरिएको छ । कलाकारको टोलीसँगै बसेर बहुप्रतिक्षित फिल्म हेर्न पाउँदा दर्शक निकै उत्साहित देखिन्थे । उद्घाटनसँगै फिल्म हल अब नियमित रूपमा सञ्चालन हुने व्यवसायी मध्येका एक उप्रेतीले जानकारी दिए ।