नेपाल राष्ट्र बैंकका डेपुटी गभर्नर बमबहादुर मिश्रले बैंकको ब्याजदर वृद्धि अस्थायी भएकाले व्यवसायीहरू आत्तिनुपर्ने अवस्था नरहेको बताएका छन् । नेपाल आर्थिक पत्रकार संघ (नाफिज) को वार्षिक जर्नल अर्थचित्र विमोचन तथा आर्थिक पत्रकार पुरस्कार समारोहलाई सम्बोधन गर्दै उनले ब्याजदर बढ्ने ट्रेण्ड सामान्य भएको भन्दै वृद्धि भएको ब्याजदर चाँडै घट्ने दाबी गरे । 

डेपुटी गभर्नर मिश्रले अहिले संसारभर ब्याजदर बढाउने ट्रेण्ड चलेकाले नेपालमा पनि त्यसको प्रभाव परेको उल्लेख गरे । उनले मुलुकको अर्थतन्त्र अफ्ठ्यारो अवस्थामा नभएको बताउनु भयो । उनले पछिल्लो समय विदेशी मुद्रा सञ्चितिमा ठूलो योगदान पुर्‍याउने रेमिट्यान्स प्रत्येक महिनामा बढ्दै गइरहेको बताए । उनले नेपालमा रेमिट्यान्स तथा विदेशी पर्यटनको आगमन बढेकाले अर्थतन्त्रमा थप सुधार आउने बताए । 

‘समय सधैँ एकै किसिमको बस्दैन । कोरोनाको अढाई वर्षेकाल र पछिल्लो रुस र युक्रेन युद्धको कारण ८ महिनाको समयमा विश्व अर्थतन्त्रमा केही मन्दीको संकेत देखापर्न आएको छ । अमेरिकाको फेडरिर्जभ बैंक, भारतीय रिर्जभ बैंक, बैंक अफ इंग्ल्याण्डले र बैंक अफ अष्ट्रेलियाले ब्याजदर केही मात्रामा बढाउँदै लगेको हुनाले अन्तराष्ट्रियस्तरमा तथा नेपालमा केही बैंक ब्याजदर बढेको छ’, उनले भने, ‘एक किसिमको ट्रेण्ड हो ट्रेन तलमाथि भइरहन्छ । हामी आत्तिनुपर्ने अवस्था रहँदैन । मुलुकको अर्थतन्त्र जुन किसिमले हेरिरहेका छौं । राष्ट्र बैंकले हेरक महिना तथ्याङ्क निकाले गरेको छ । तथ्याङ्कलाई हेर्दा नेपालको अर्थतन्त्र धेरै अप्ठ्यारो स्थितिमा छैनौंँ ।’