सशस्त्र प्रहरी बल, नेपाल (एपीएफ) र भारतको सशस्त्र सीमा बल (एसएसबी) बीच बिहीवार समन्वयात्मक बैठक सम्पन्न भएको छ । शसस्त्र प्रहरीको मुख्यालय हलचोकमा एपीएफ र एसएसबीबीच छैठौँ समन्वयात्मक बैठक भएको हो । 

दुई सुरक्षा निकायबीचको समन्वयात्मक बैठक असोज ११ गतेबाट शुरु भएको थियो । बिहीवार दुई देशका सुरक्षा निकायबीच सीमा अपराध नियन्त्रणलगायतका विषयमा लिखित सम्झौता समेत भएको छ । 

बैठकमा सशस्त्र प्रहरी बल, नेपालको तर्फबाट सशस्त्र प्रहरी महानिरीक्षक राजु अर्याल तथा भारतको सशस्त्र सीमा बलको तर्फबाट महानिर्देशक सुजय लाल थाओसेनले नेतृत्व गरेका थिए । 

बैठकमा सीमा सुरक्षालाई थप प्रभावकारी बनाउँदै लैजाने, सीमापार अपराध नियन्त्रण गरी सीमा सुरक्षालाई थप सुरक्षित बनाउन दुई सुरक्षा निकायवीच निरन्तर समन्वय र सहकार्य तथा सूचना आदनप्रदान गर्ने सहमति भएको छ । 

यसका साथै सीमा नाकामा हेल्प डेस्क स्थापना गर्ने कार्यलाई निरन्तरता दिँदै सीमा क्षेत्रमा प्रभावकारी कार्य गर्ने सहमति भएको सशस्त्र प्रहरीले जानकारी दिएको छ ।