निर्वाचन आयोगले नेपाली सेना र प्रहरीबाट सञ्चार माध्यमको अनुगमन गर्ने तयारी गरेपछि पत्रकारहरू विरोधमा उत्रिएका छन् । शनिवार नेपाल पत्रकार महासंघ जिल्ला शाखा भक्तपुरको बैठकले हातमा कालो पट्टी बाँधेर निर्वाचनको समाचार संकलन गर्ने निर्णय गरेको सचिव सन्जीप शुभचिन्तकले जानकारी दिए ।

नेपालमा मिडिया अनुगमन गर्ने निकाय प्रेस काउन्सिल हुँदा–हुँदै निर्वाचन आयोगले चालेको कदम गलत भएकाले सांकेतिक विरोधस्वरुप सो निर्णय गरेको सचिव शुभचिन्तकले बताए ।

सो बैठकले नगरकोटलाई पर्यटकीय क्षेत्र घोषणा गर्न र भक्तपुर–नगरकोट सडकको काम चाँडै सम्पन्न गर्नसमेत सरकारको ध्यानाकर्षण गराएको कार्यवाहक अध्यक्ष सुन्दर शिल्पकारले बताए ।