मंसिर ४ गते हुने प्रतिनिधि सभा निर्वाचनमा नेकपा माओवादी केन्द्रका अधिकांश पदाधिकारी प्रत्यक्षतर्फ चुनाव लड्ने भएका छन् । अध्यक्ष पुष्पकमल दाहाल प्रचण्ड, महासचिव देव गुरुङसहित उपमहासचिवहरू प्रत्यक्ष चुनाव लड्ने भएका हुन् । 

राष्ट्रिय सभा सदस्यसमेत रहेका वरिष्ठ उपाध्यक्ष नारायणकाजी चुनाव लड्ने/नलड्ने निश्चित छैन । राष्ट्रिय सभामा श्रेष्ठको कार्यकाल ४ वर्ष बाँकी छ । अर्का उपाध्यक्ष कृष्णबहादुर महराले समानुपातिकतर्फ आफ्नो स्थान सुरक्षित गरिसकेका छन् । 

गोर्खा १ बाटसमेत सिफारिस भए पनि अध्यक्ष प्रचण्ड चितवन ३ बाटै चुनाव लड्ने निश्चित छ । महासचिव गुरुङ यसअघि निर्वाचित भएको लमजुङबाट चुनाव लड्ने तयारीमा छन् । २०६४ सालको पहिलो संविधान सभा निर्वाचनमा गुरुङ मनाङबाट विजयी भएका थिए । 

माओवादीका पाँचजना उपमहासचिव सबैले प्रत्यक्षमा चुनाव लड्ने तयारी गरेका छन् । अर्थमन्त्रीसमेत रहेका जनार्दन शर्मा रुकुम पश्चिमबाट चुनाव लड्दैछन् । २०७४ सालको चुनावमा पनि उनी रुकुम पश्चिमबाट चुनाव लडेका थिए । रुकुम पश्चिममा प्रतिनिधि सभातर्फ गठबन्धनका अन्य दलले दाबी गरेका छैनन् ।

ऊर्जामन्त्री पम्फा भुसाल ललितपुर ३ बाट चुनाव लड्दैछिन् । यसअघि यही क्षेत्रबाट दुई पटक प्रत्यक्ष चुनाव जितेकी भुसाल यसपटक ह्याट्रिक गर्ने दाउमा छिन् । २०६४ सालको संविधानसभा र २०७४ सालको प्रतिनिधि सभा चुनावमा उनले ललितपुर बाटै प्रत्यक्ष जितेकी थिइन् ।

समानुपातिकमा बस्न गरेको आग्रह बेवास्ता गर्दै भुसालले प्रत्यक्षतर्फ नै चुनाव लड्न लागेकी हुन् । पुल्चोक क्याम्पसमा राजनीति गर्दाको समयदेखि नै भुसालले ललितपुर ३ मा संगठन विस्तारको काम गरेकी थिइन् । ललितपुर महानगरपालिका कोर नेवार वस्तीमा समेत उनको राम्रो प्रभाव छ ।

२०७४ सालको प्रतिनिधि सभा निर्वाचनमा उपत्यकामा १५ मध्ये माओवादीले एउटै मात्र जितेको क्षेत्र ललितपुर ३ थियो । आसन्न प्रतिनिधि सभा निर्वाचनमा पनि उपत्यकामा ठूला दलको तर्फबाट सशक्त महिला उम्मेदवार भुसाल हुन् । यसअघि चुनाव जितेको ठाउँ सम्बन्धित दलले लिने गठबन्धनले बनाएको पहिलो मापदण्डकै आधारमा ललितपुर पम्फाका लागि सुरक्षित बनेको हो । 

ललितपुर ३ अन्तर्गत प्रदेश सभामा (क) माओवादीले नै लिएर (ख) कांग्रेसले पाउने सम्भावना रहेको कांग्रेसनिकट स्रोतले बतायो । 

माओवादीका अर्का उपमहासचिव वर्षमान पुन रोल्पाबाट चुनाव लड्दैछन् भने शक्ति बस्नेत जाजरकोटबाट चुनाव लड्दैछन् । हरिबोल गजुरेल सिन्धुली, मात्रिका यादव धनुषा र गिरिराजमणि पोखरेल महोत्तरीबाट चुनाव लड्ने तयारीमा छन् । 

मंसिर ४ गते हुने प्रतिनिधि सभा निर्वाचनका लागि असोज २३ गते आइतवार उम्मेदवार मनोनयनको कार्यक्रम छ । उम्मेदवार मनोनयनको दिन नजिकिँदै गर्दा गठबन्धनले सीट बाँडफाँटलाई अन्तिम चरणमा पुर्‍याएको छ ।