नेपाली कांग्रेसले समानुपातिक उम्मेदवारको बन्द सूची सच्याउन केन्द्रीय कार्यसम्पादन समितिको बैठक बोलाएको छ । शनिवार प्रधानमन्त्रीको सरकारी निवास बालुवाटारमा बस्ने गरी कार्यसम्पादन समितिको बैठक बोलाइएको कांग्रेसका एक नेताले जानकारी दिए । 

कार्यसम्पादन समितिको बैठक बस्नुअघि पदाधिकारी बैठक बसेर छलफल गर्ने तयारी कांग्रेस सभापति शेरबहादुर देउवाले गरेका छन् । पदाधिकारीहरुलाई नै दिउँसो ३ बजे नै बालुवाटार बोलाइएको छ ।

मंसिर ४ गते हुने निर्वाचनको लागि कांग्रेसले निर्वाचन आयोगमा बुझाएको समानुपातिक उम्मेदवारको सूचीमा संस्थापन पक्षले एकलौटी गरेको भन्दै संस्थापनइतर समूह विरोधमा छ । उनीहरूले समानुपातिकतर्फको सूची सच्याउनुपर्ने माग गरेका छन् । 

समानुपातिक उम्मेदवारको सूचीमा प्रधानमन्त्री शेरबहादुर देउवाकी पत्नी आरजु राणा र गृहमन्त्री बालकृष्ण खानकी पत्नी मञ्जु खाणको नाम राखेपछि कांग्रेसभित्र तीव्र असन्तुष्टि छ । ​संस्थापनइतर समूहले राणा र खाणको नाम समानुपातिक सूचीबाट हटाउनुपर्ने माग गरेका छन् । 

बैठकमा प्रत्यक्षतर्फका उम्मेदवार चयनको बारेमा पनि छलफल हुनसक्ने नेताहरूले बताएका छन् ।  

कांग्रेस शेखर कोइराला पक्षले समानुपातिक उम्मेदवारको सूचीको चर्को विरोध गरेपछि सभापति देउवा झस्किएका थिए । टिकटका आकांक्षा गरेका र टिकट नपाउनेहरू कोइराला खेमामा गोलबन्द हुनसक्ने देखेपछि देउवाले समानुपातिक सूचीमा पुनर्विचार गर्न लागेको कांग्रेसका नेताहरू बताउँछन् । 

निर्वाचन आयोगले असोज १६ गतेसम्म समानुपातिकतर्फको बन्द सूची सच्याउन समय दिएको छ ।