नेकपा एमालेले शहीद रामनारायण मण्डल (मुरबल)की श्रीमती फूलोकुमारी देवीको नाम समानुपातिक उम्मेदवारको बन्द सूचीमा समावेश गरेको छ । गत असोज ८ मा जनकपुर जाँदा एमाले अध्यक्ष ओली शहीद नगर–नगरपालिकाको हडबारा गाउँमा रहेको शहीद मण्डलको घरमा पुगेर फूलोकुमारी देवीसँग भेट गरेका थिए । 

उनी उमाशंकर अरगरियालाई पार्टी प्रवेश गराउन ओली जनकपुर पुगेका थिए । गत असोज ३ मा समानुपातिक उम्मेदवारको सूची बुझाएको एमालेले ओली जनकपुरबाट फर्केपछि समानुपातिक सूची सच्याएको हो । 

फूलोकुमारी देवीलाई मधेश प्रदेशअन्तर्गतको समानुपातिक सूचीमा राखिएको एमाले स्रोतले जानकारी दिएको छ । समानुपातिक उम्मेदवारको सूची सच्याउन निर्वाचन आयोगले दिएको असोज १६ सम्मको समय दिएको छ । 

धनुषामा तत्कालीन नेकपा माले हुँदै एमाले निर्माण गर्नेमध्येका एक अगुवा थिए रामनारायण मण्डल । उनको हत्या भएको थियो । उनलाई मारेपछि परिवारलाई समेत सखाप पार्न खोजिएको स्मरण ओलीले उनको घरमा पुगेका बेला गरेका थिए । 

त्यसबेला, मण्डललाई मारेपछि जेठा छोरालाई पोखरीमा डुबाएर मारिएको ओलीले स्मरण गरेका थिए । कान्छो छोरासहित आमालाई जोगाउन ओलीले काठमाडौं ल्याएको बताएका थिए । 

‘रामनारायण मण्डल हडबडा गाविसको अध्यक्ष, उहाँको हत्या भएको थियो । उहाँको ठूलो छोरालाई पोखरीमा फालेर मारे । कान्छो छोरो बचाउन उहाँ र कान्छोलाई काठमाडौं झिकाएर उपचार गरेर पाल्पामा लुकाएर राखेँ । पछि पाल्पा बस्न सक्नुभएन र यता फर्किनुभयो’, फूलोकुमारी देवीसँगको भेटमा ओलीले भनेका थिए ।