त्रुटि सच्याएर समानुपातिकतर्फका उम्मेदवारहरूको बन्दसूचीको अन्तिम नामावली निर्वाचन आयोगमा बुझाउने समय सकिएको छ । निर्वाचन आयोगले आगामी प्रदेश र प्रतिनिधि सभाको निर्वाचनमा सहभागी दलहरूलाई समानुपातिक नामावलीमा त्रुटि भए सच्याएर पेस गर्न आज (आइतवार) साँझ ५ बजे सम्मको समय दिएको थियो । 

उपन्यायाधिवक्ता गुरुप्रसाद वाग्लेका अनुसार आइतवार ४ बजेसम्म विभिन्न ३१ दलले प्रतिनिधि सभातर्फ नामावली सच्याएर पेश गरेका छन् । उनले आजसम्म १२ वटा राजनीतिक दललाई पेश भएको बन्दसूचीमा सच्याउनलाई पत्राचार गरेको उल्लेख गरे । 

वाग्लेका अनुसार प्रतिनिधि सभातर्फ प्रदेश १ मा ३१, मधेश प्रदेशमा २१, बागमती २०, गण्डकी २५, लुम्बिनी २४, कर्णाली २० र सुदूरपश्चिममा २४ वटा दलले सच्याएको बन्दसूची पेश गरेका छन् । आइतवार ५ बजेसम्मका दलहरूले बन्दसूची सच्याएर पेश गरेपछि आयोगले सच्याएर पेश गरिएका बन्दसूचीको काम सक्ने उनले बताए । 

उपन्यायाधिवक्ता वाग्लेले सोमवारबाट राजनीतिक दलले पेश गरेको बन्दसूचीमा नामावली भएको कुनै उम्मेदवारले बन्दसूचीबाट आफ्नो नामावली फिर्ता लिन चाहेमा सोमवार १ बजेसम्मको समय दिने बताए । उनले सोमवार नै १ बजेदेखि ५ बजेसम्म बन्दसूची पेश भएको सम्बन्धित व्यक्तिले फिर्ता लिएको बारेमा सम्बन्धित दललाई जानकारी गराउने आयोगको कार्यसूची छ । 

फिर्ता लिएको उम्मेदवारको सट्टामा अर्को कुनै उम्मेदवार पेश गर्न दललाई पत्राचार गर्ने र यो क्रम आगामी २२ गतेसम्म जारी रहने उपन्यायाधीवक्ता वाग्लेले बताए । २२ गते बेलुका सबै नामावली प्रकाशन गर्ने र प्रकाशित भएका नामावलीमा कसैको दाबी विरोधलाई २३ गतेपछिको कार्यतालिका बनाइएको बताए । 

उपन्यायाधिवक्ता वाग्लेले दलले पेश गरेको बन्दसूचीमा धेरैजसो समानुपातिक समावेशी समूहको क्लष्टर नमिलेको पाइएको पनि बताए । उनले कुनै एक क्लस्टरमा हुनुपर्नेको नाम अन्य क्लस्टरका लागि राखिएको पाइएको बताए । उनले भने, ‘दलले पेस गरेको बन्दसूचीमा धेरैजसो समानुपातिक समावेशी समूहको क्लष्टर नमिलाएर पेश गरेको देखिएको छ । अर्थात् थारु क्लस्टरमा हुनुपर्ने उम्मेदवारको नाम अरु क्लस्टरमा आउने वा मधेशी क्लस्टरमा हुनुपर्ने उम्मेदवारको नाम अर्कोमा जाने यस्तो केही केही दलमा भएको छ ।’