गत चैतदेखि अवरुद्ध जिल्लाका अधिकांश ग्रामीण सडक अझै सञ्चालन भएको छैन । कच्ची अवस्थामा सञ्चालन हुँदै आएको जिल्लाका ग्रामीण सडक वर्षा नरोकिएका कारण सञ्चालनमा ल्याउन नसकिएको हो । 

ग्रामीण सडक सञ्चालन नहुँदा दशैं, तिहार तथा छट मान्न गाउँ फर्किएका जिल्लावासीलाई सबैभन्दा बढी सास्ती भएको छ । वर्ष दिनपछि आउने चाड दशैं, तिहार तथा छट पर्व मनाउन राजधानी काठमाडौं लगायत तराईका विभिन्न ठाउँबाट गाडी चढेर जिल्ला आएका ग्रामीण सडकमा यातायात नचल्दा दिक्तेलबाट करीब ६/७ घण्टासम्म पैदल हिँड्न बाध्य भएका छन् । 

सडकमा जमेको हिलो र खाल्डाखुल्डीका कारण पैदलयात्रा गर्न समेत समस्या रहेको केपिलासगढी गाउँपालिका–१ फेदीका स्थानीय लक्ष्मण साम्पाङले बताए । ‘ग्रामीण सडकमा देखिएका समस्यालाई दीर्घकालीन रूपमा समाधान गर्नुपर्ने देखिन्छ,’ उनले भने, ‘यो जिल्लाले समाधान गर्न सक्ने अवस्था छैन । सम्बन्धित निकायले सम्बन्धित ठाउँमा पहल गर्नुपर्‍यो । हैन भने हरेक वर्ष यस्तै अवस्था हुने निश्चित छ ।’

रोजगारी, अध्ययन तथा विभिन्न पेशा/व्यवसाय लगायत विभिन्न सेवा/सुविधाका लागि जिल्ला बाहिर बसेका स्थानीय वासिन्दा चाड मान्न सवारी साधनमार्फत दैनिक सयौंको संख्यामा जिल्ला भित्रिरहेका छन् । सार्वजनिक यातायातको टिकट नपाउने जिल्लाका कतिपय स्थानीय चर्को मूल्य तिरेर रिजर्भ गाडीमा आइरहेका छन् ।  

ठेक्का लागेको सडकमा ठेकेदारको लापरवाही र अन्यमा स्थानीय तहले चासो नदिँदा समस्या भएको खोटाङ यातायात प्रालिका महासचिव रामकुमार हिङमाङले बताए । ‘चाड मान्न आउने अधिकांश यात्रुले मालसामान लिएर आएका हुन्छन् । ग्रामीण सडक सञ्चालन नहुँदा उनीहरूलाई गन्तव्यमा पुर्‍याउन सकिएको छैन,’ उनले भने, ‘यातायातका साधन ग्रामीण सडकमा नभएपछि उनीहरू पैदल हिँडेर गन्तव्यतर्फ जाने गरेका छन् । यसप्रति सम्बन्धित पक्षले ध्यान दिन जरुरी छ ।’